Екінті намазынан кейін ашыр оқу бидғат па?

Намаздардан кейін, елеулі бір себеп болмаған жағдайда, орнынан бірден тұрмай, біраз уақыт зікір және тәсбихатпен айналысу сүннет болып табылады. Хазреті Пайғамбар (с.а.с.) намаздардан кейін мұны істеуді ынталандырған, адам намаз оқыған орнынан тұрмайынша періштелер оған дұға етуді жалғастыратынын хабарлаған. (Бухари, Саләт, 87 [477]; Муслим, Мәсәжид, 272 [649]) Сонымен қатар, Хазреті Пайғамбар (с.а.с.) таң намазынан кейін Хашр сүресінің соңғы үш аятын, түнде де Бақара сүресінің соңғы екі аятын оқуды ұсынған. (Бухари, Фәзаилүл-Құран, 10 [5009]; Тирмизи, Фәзаилүл-Құран, 22 [2922]) Таң намазынан басқа, Хазреті Пайғамбардың (с.а.с.) намаздардан кейін оқуды ұсынған арнайы ашыр немесе сүре жоқ. Дегенмен, Құран Кәрімде «Намазды аяқтаған соң да, түрегеп тұрғанда да, отырып та, жатып та (әрдайым) Алланы еске алыңдар.» (ән-Ниса, 4/103) деп бұйырылуы, бұл мәселеде кеңшілік бар екенін әрі зікір мен тәсбихат тек намазбен шектелмейтінін білдіреді. Намаздан тыс Құран оқу, зікір және тәсбихатта негізінен әркімнің жеке өзі істеуі басты қағида. Хазреті Пайғамбар (с.а.с.) дәуіріндегі тәжірибе де осындай болған. Алайда кейінірек тәсбихаттың азаншының жетекшілігімен ұжымдық түрде жасалуы және ‘ашыр’ оқылуы кейбір елдерде кең таралып, бүгінгі күнге дейін осылай жалғасып келеді.

Осыған сәйкес, екінті намазынан кейін ашыр оқу туралы нақты риуаят болмаса да, жоғарыдағы аят пен хадистерге сүйене отырып, діни тұрғыдан уәжіп деп сенбей, Құран оқудың ешқандай сөкеттігі жоқ деп айтуға болады.

Дереккөз: T.C. Diyanet İşleri Başkanlığı, Din İşleri Yüksek Kurulu