Ғұсыл (бой дәреті) қашан парыз болады және сүннетке сай ғұсыл қалай алынады?

Ғұсыл – жүніптік, хайыз және нифас сияқты үкімдік ластық халдерін жою үшін ауыз бен мұрынды қоса алғанда бүкіл денені жуу арқылы жасалатын арнайы тазалық дегенді білдіреді. Құран Кәрімде: «Егер жүніп болсаңдар, жақсылап тазаланыңдар (жуыныңдар).» (ән-Ниса, 4/43; әл-Маида, 5/6) деп бұйырылған. Хазреті Пайғамбардың (с.а.с.) сүннетінде де ұйқыда ұрық келуі немесе жыныстық қатынастан кейін жүніп болғанда, сондай-ақ хайыз бен нифастан кейін ғұсыл алу әмір етілген. (Бухари, Ғусл, 22, 28 [282, 291]; Муслим, Хайыз, 87-88 [348-349]; Әбу Дәуіт, Тахарат, 118, 127 [314, 359])

Ғұсыл дәреті – ауызға су алып, тамаққа дейін шайқау, мұрынға су тарту және бүкіл денені құрғақ жер қалдырмай жуу арқылы алынады. Мұнда аталған амалдар – Ханафи мәзһабында ғұсылдың парыздары болып табылады. Олардың біреуі орындалмаса, ғұсыл дұрыс болмайды. Бұлардан басқа ғұсылдың сүннеттері де бар.

Сүннеттері де орындалса, ғұсыл былай алынады:

Ғұсыл алғысы келген адам ниет етіп, «Бисмиллаһ» деп бастайды. Қолдарын жуады, денесінде нәжіс/материалдық ластық болса, оны тазартады, әурет жерлерін жуады. Содан кейін оң қолымен үш рет аузына су алып жақсылап шайқайды, үш рет мұрнына су тартып тазартады және намаз дәреті сияқты дәретін толық алады. Сосын бүкіл денесін жақсылап жуады. Егер ғұсыл алып жатқан жерде су жиналса, соңында аяқтарын жуып, ғұсылын аяқтайды.

Дереккөз: T.C. Diyanet İşleri Başkanlığı, Din İşleri Yüksek Kurulu