Истиһара намазы қалай оқылады? Истиһара қалай жасалады?

Истиһара — адам өзіне бір істің қайырлы немесе қайырсыз боларын білу мақсатында ұйықтардан бұрын екі рәкат намаз оқып, Алладан дұға етуі. Кейде адамдар өздері үшін маңызды шешім қабылдайтын немесе таңдау жасайтын кезде, дүние мен ақырет тұрғысынан қайсысының қайырлы боларын білмей қалады. Мұндай жағдайда олар ақылдасады және Алладан жәрдем сұрайды. Осы тұрғыдан истиһара — жасалатын істің қайырлы болуын, егер қайырлы болса жүзеге асуын Алладан тілеу және Одан көмек сұрау болып табылады. Пайғамбарымыз (с.а.у.) сахабаларына әр істе истиһара жасауды Құранның бір сүресін үйреткендей үйреткен. (Бухари, Тәһәжжүд, 28 [Баб Башлығы]; Дәғуат, 48 [6382]; Тәуһид, 10 [7390])

Истиһара намазы — мұстахаб амал. Бірінші рәкатта Фатиха сүресінен кейін Кафирун сүресі, екінші рәкатта Фатиха сүресінен кейін Ихлас сүресі оқылады. Намаздан кейін истиһара дұғасы жасалады. Пайғамбарымыз истиһарада былай дұға етуді ұсынған:

اللَّهُمَّ إِنِّي أَسْتَخِيرُكَ بِعِلْمِكَ وَأَسْتَقْدِرُكَ بِقُدْرَتِكَ وَأَسْأَلُكَ مِنْ فَضْلِكَ العَظِيمِ، فَإِنَّكَ تَقْدِرُ وَلاَ أَقْدِرُ وَتَعْلَمُ وَلاَ أَعْلَمُ وَأَنْتَ عَلَّامُ الغُيُوبِ، اللَّهُمَّ إِنْ كُنْتَ تَعْلَمُ أَنَّ هَذَا الأَمْرَ خَيْرٌ لِي فِي دِينِي وَمَعَاشِي وَعَاقِبَةِ أَمْرِي - أَوْ قَالَ عَاجِلِ أَمْرِي وَآجِلِهِ - فَاقْدُرْهُ لِي وَيَسِّرْهُ لِي، ثُمَّ بَارِكْ لِي فِيهِ وَإِنْ كُنْتَ تَعْلَمُ أَنَّ هَذَا الأَمْرَ شَرٌّ لِي فِي دِينِي وَمَعَاشِي وَعَاقِبَةِ أَمْرِي - أَوْ قَالَ فِي عَاجِلِ أَمْرِي وَآجِلِهِ - فَاصْرِفْهُ عَنِّي وَاصْرِفْنِي عَنْهُ وَاقْدُرْ لِي الخَيْرَ حَيْثُ كَانَ ثُمَّ أَرْضِنِي.

«Аллаһым! Сенің іліміңмен мен үшін қайырлысын маған білдіруіңді, құдіретіңмен маған күш беруіңді сұраймын. Сенің ұлы кеңшілігіңнен маған берекет беруіңді тілеймін. Сенің әр нәрсеге құдіретің жетеді, мен әлсізбін; сен бәрін білесің, мен білмеймін; расында сен барлық құпияны білушісің. Аллаһым! Осы істі істеу менің дінім, өмірім, дүнием және ақыретім үшін қайырлы болса, оны маған нәсіп ет, оны маған жеңілдет, оны мен үшін берекелі ет! Егер бұл іс менің дінім, тұрмысым, дүнием және ақыретім үшін жаман болса, оны менен алыстат, мені одан алыстат. Қайыр қайда болса да, оны маған нәсіп ет және мені соған разы ет!» (Бухари, Тәһәжжүд, 28 [Баб Башлығы]; Дәғуат, 48 [6382]; Тәуһид, 10 [7390])

Ғибадат және сауап істеу сияқты жақсы екені, харам және күнә істеу сияқты жаман екені анық нәрселерде истиһара жасалмайды. Истиһара — дұрыс-бұрыстығына күмән болған істерде жасалады және жеті рет қайталануы мүмкін. Истиһарадан кейін адамның жүрегіне бір ашықтық келеді және алғаш көңілге түскен нәрсенің қайырлы екені қабыл етіліп, соған амал етіледі. (Ибн Абидин, Реддул-мухтар, 2/26-27) Истиһарадан кейін түс көру және ол түсті жақсыға немесе жаманға жору туралы негіз жоқ. Егер истиһара намазын оқи алмаса, тек дұғасын оқу жеткілікті.

Дереккөз: T.C. Diyanet İşleri Başkanlığı, Din İşleri Yüksek Kurulu