Жындар мен шайтан адамдарға зиян келтіре ала ма?

Жындар да адамдар сияқты жауапты жаратылыс ретінде жаратылған. (әз-Зарият, 51/56) Аллаға сеніп, Оған құлшылық ететін, жақсы амал жасайтын жындар да бар, адамдарға зиян келтіргісі келетін және оларды иман мен жақсы амалдан алыстатуға тырысатын кәпір жындар да бар. Құран Кәрімде адам мен жынның шайтандары туралы айтылады: «Осылайша Біз әр пайғамбарға адам мен жын шайтандарын дұшпан қылдық. Олар бір-біріне алдау үшін жылтырақ сөздерді сыбырлайды. Раббың қаласа, олар мұны істей алмас еді. Ендеше оларды жала сөздерімен қалдыр.» (әл-Әнғам, 6/112) Бұл аятта көрсетілгендей, шайтандық іс істейтін жындарға шайтан делінеді. Шайтандардың басшысы Ібілістің жындардан болғаны Кәһф сүресінің 50-аятында былай баяндалады: «Біз періштелерге: «Адамға сәжде етіңдер» деген едік, Ібілістен басқа бәрі сәжде етті. Ібіліс болса, жындардан еді де, Раббысының әмірінен шықты. Енді сендер Мені тастап, Ібілісті және оның ұрпағын өздеріңе дос етіп аласыңдар ма? Олар сендерге дұшпан. Бұл залымдар үшін қандай жаман айырбас!»

Жалпы Құран Кәрімге, әсіресе жоғарыда қазақша мағынасын келтірген екі аятқа қарағанда, шайтандардың және сол арқылы жындардың жамандары адамдарға ең алдымен сенім мен амал тұрғысынан зиян келтіруге тырысады. Себебі Құран мен Пайғамбарымыздың (с.а.с.) түсіндірмелеріне қарағанда, шайтан мен шайтандық іс істейтін жындардың дұшпандығы адамдарды алдап, жамандыққа итермелеу арқылы болады, материалдық және физикалық зиян туралы айтылмайды. Сондықтан Ұлы Алла: «Шайтанның ізінен ермеңдер. Өйткені ол сендерге ашық дұшпан.» (әл-Бақара, 2/208) деп бұйырған. Мұнда шайтанның ізінен ермеу дегеніміз — шайтан мен жындардың азғыруына еріп, жаман амал жасамау екені анық. Жын сүресінің 6-аятында былай делінеді: «Шынында адамдардан кейбіреулер жындардан кейбіреулерге сиынатын еді, сонда жындар олардың азғындығын арттыратын.» Бұл аятта көрсетілгендей, жындардың адамдарға зиян келтіруі — Ұлы Алланың анық ескертуіне қарамастан, адамдардың жындарға сиынып, олармен байланыс орнатуға және көмек сұрауға ұмтылуынан болады. Осы себепті Фәлақ және Нәс сүрелерінде бұл жағдайға назар аударылып, адамдарға, жындарға және барлық жаратылыстың жамандығы мен азғыруынан бәрінің Раббысы болған Ұлы Аллаға сиыну ұсынылады. Демек, шын мәнінде Аллаға сенгендерге шайтандар мен жындардың үстемдігі, қысым көрсетуі және зиян келтіруі мүмкін емес. Шайтан мен жын шайтандарының үстемдігі мен зияны тек оларды дос еткендер мен Аллаға серік қосқандарға ғана қатысты. (қараңыз: ән-Нахль, 16/99-100)

Сондықтан мүміндер жын мен адам шайтандарының барлық жамандығы мен зиянынан Аллаға (с.т.) сиынып, олардан қорықпауы керек. Оларға ешқашан бейім болмай, еркіндігін тек ақиқат пен шындық жолында пайдаланғандар жын мен шайтандардан келетін кез келген әсер мен зияннан қорғалады.

Дереккөз: T.C. Diyanet İşleri Başkanlığı, Din İşleri Yüksek Kurulu