Көз тиюден қорғану үшін көзмоншақ тағу шариғатта рұқсат па?

Көз тиюдің мәні мен сипаты толық анықталмағанымен, кейбір адамдардың қарауымен жағымсыз әсерлер пайда болуы дінде де мойындалады. Бір хадисте: «(Көз тиюден) Аллаға сыйыныңдар, өйткені көз тию (шындық)» (Ибн Мәжа, Тиб, 32 [3508]) деп айтылған. Пайғамбарымыз (с.а.с.) көз тиюден қорғану үшін Аятүл-Күрси, Ихлас және Муаввизатейн (Фәлақ, Нас) сүрелерін оқығаны; сахабаларына да осы сүрелерді оқуды кеңес бергені; көз тиюден құтылу үшін тікелей Алла Тағалаға (с.т.) жалбарынғаны риуаят етіледі. (қараңыз: Бухари, Тиб, 32-38 [5735-5742]; Тирмизи, Тиб, 16 [2058]; Ибн Мәжа, Тиб, 32-36 [3508-3525]; Камиль Мирас, Тәжрид Тәржемесі, 12/90)

Көз тию мәселесінде Пайғамбарымыздың кеңестерін орындап, нәтижесін Ұлы Алладан күту – ислам сенімінің талабы. Дінімізде түпкі әсерді Алладан басқаға телитін әрекет, мінез-құлық және сенімдер тыйым салынған. Сондықтан көзмоншақ және соған ұқсас заттарды, олардан медет күту мақсатында мойынға немесе басқа жерге тағу шариғатта рұқсат етілмейді. Мұндай әрекет жасағандар туралы Пайғамбарымыз (с.а.с.): «Кім көзмоншақ тақса, Алла оның ісін аяқсыз қалдырсын» (Ахмад б. Ханбал, әл-Мүснад, 4/154 [17440]) деп айтқан. Басқа бір хадисте көзмоншақ тағып, оған қорғаныш әсерін теліген адам Аллаға серік қосқан болады деп айтылған. (Ахмад б. Ханбал, әл-Мүснад, 4/156 [17458]) Көз тиюден сақтану үшін осындай ырымдарды тастап, Пайғамбарымыз үйреткен дұғаларды оқу керек. (қараңыз: Бухари, Тиб, 32-38 [5735-5742]; Тирмизи, Тиб, 16 [2058]; Ибн Мәжа, Тиб, 32-36 [3508-3525]; Камиль Мирас, Тәжрид Тәржемесі, 12/90) Осы тұрғыда Фәлақ және Нас сүрелерімен қатар Пайғамбарымыздың (с.а.с.) немерелеріне оқыған мына дұға да оқылуы тиіс: «Әр түрлі шайтан мен улы жәндіктерден және барлық жаман көздерден Алланың кемел сөздеріне сыйынамын» (Бухари, Әхадисул-әнбия, 10 [3371])

Дереккөз: T.C. Diyanet İşleri Başkanlığı, Din İşleri Yüksek Kurulu