Мәсіге мәсіх қалай жасалады және оның шарттары қандай?

Мәсі – аяқтарды тобықтарымен бірге жабатын, белгілі сипаттағы аяқ киімдерге берілетін атау.

Мәсілерге мәсіх тартудың рұқсат етілуі үшін қажетті шарттар мыналар:

а) Аяқтар жуылып алынған дәреттен кейін киілуі;

ә) Аяққа киілген күйінде қалыпты жүріспен шамамен 5 км немесе одан да көп жүруге төзімді болуы;

б) Мәсілер аяққа киілгеннен кейін баусыз тұра алатындай берік әрі қалың болуы;

в) Әр мәсінің өзінде ең кіші аяқ саусағының үш есесі көлеміндей тесік болмауы;

г) Суды сіңіріп, бірден аяққа өткізбейтін болуы керек.

Мәсіх – бұл бір түрі үкімдік тазалық; дәретте бір мүшеге, аяққа киілген мәсіге немесе жараға таңылған таңғышқа дымқыл қолмен жүргізіледі; тәйәммумда болса, топыраққа тигізілген қолмен бет пен қолдарға жүргізіледі.

Дәрет алғанда мәсілерге мәсіх тарту – Пайғамбарымыздың (с.а.с.) сүннетімен бекітілген. Расында, Пайғамбарымыздың (с.а.с.) дәрет алып, мәсілеріне мәсіх тартқаны туралы көптеген риуаяттар бар. (Бухари, Вуду’, 35, 48 [182, 202]; Муслим, Тахарат, 72-73 [272-273])

Дәретті болып аяққа мәсі киген адам, мәсі кигеннен кейін дәреті бұзылған сәттен бастап, тұрақты болса – бір күн, жолаушы болса – үш күн мәсілерге мәсіх тарта алады. Себебі Пайғамбарымыз (с.а.с.) жолаушы үшін үш күн үш түн, тұрақты үшін бір күн бір түн мәсіге мәсіх мерзімін белгілеген. (Муслим, Тахарат, 85 [276])

Мәсіге мәсіх тартып дәрет алғаннан кейін, дәретті күйде екі мәсісін немесе біреуін шешкен адам, дәреті бұзылмай тұрып аяқтарын жуып, қайтадан мәсі киюі керек. Бұл адам дәретсіз кезде мәсілерін шешсе, қайта дәрет алғанда аяқтарын жууы керек. Мәсіх мерзімі аяқталғанда, дәретті болса мәсіні шешіп, аяқтарын жууы жеткілікті; дәретсіз болса, аяқтарын жуып толық дәрет алуы тиіс. (Касани, Беда’и, 1/9)

Дереккөз: T.C. Diyanet İşleri Başkanlığı, Din İşleri Yüksek Kurulu