Қандил түндеріне арналған арнайы намаз немесе ғибадат түрі бар ма? Қасиетті түндерді қалай өткізу керек?

Пайғамбарымыз Мұхаммед (с.а.с.) кейбір қасиетті күндер мен түндерді қадірлеуді ұсынған (Бухари, Савм, 6 [1901]; Муслим, Салату’л-мусафирин, 175 [760]; Бейхаки, Ма‘рифатү’с-сүнән вә’л-асар, 4/420 [6676]), өзі де бұл күндер мен түндерді ерекше өткізген (Тирмизи, Савм, 39 [739]; Ибн Мәжа, Иқамәтү’с-салават, 191 [1389]; қараңыз: Нәуәуи, әл-Мәжму’, 5/42-43). Алайда бұл күндер мен түндерге тән арнайы намаз немесе ғибадат түрі жайлы айтпаған. Осы тұрғыда қасиетті күндер мен түндерді кешірім сұрап, өмірімізді ретке келтіру үшін мүмкіндік деп қарауымыз керек. Сондықтан мұсылмандар қандил түндерінде өмір жолын қайта қарап, қателік пен күнәлары үшін тәубе етіп, дұға жасап, Құран Кәрімді оқып, түсінуге тырысып, қаза немесе нәпіл намаздарын оқып, бұл мүмкіндіктерді тиімді пайдалануы тиіс.

Қандил түндерінен кейінгі күндері, яғни келесі күні ораза ұстау мұстахап болып табылады. Себебі Пайғамбарымыз (с.а.с.): «Шағбан айының он бесінші түні (яғни Бәраат түні) болғанда, сол түні ғибадат етіңдер, күндізінде ораза ұстаңдар. Алла Тағала сол түні күн батқаннан таң атқанға дейін аспанға (рахымымен) түседі де: ‘Менен кешірім сұраған бар ма, кешірейін; ризық сұраған бар ма, ризық берейін; қиындыққа ұшыраған бар ма, амандық берейін; сұраушы бар ма...'» (Ибн Мәжа, Иқамәтү’с-салават, 191 [1388]; қараңыз: Тирмизи, Савм, 39 [739]) деп айтқан.

Дереккөз: T.C. Diyanet İşleri Başkanlığı, Din İşleri Yüksek Kurulu