Аялдардын мечитте намаз окушу туурабы?

Негизи аялдардын мечитке барып жамаат менен намаз окуусунда эч кандай тыюу жок. Бирок үйүндө окуганы жакшыраак [1] .

Алла Элчиси (ага Алланын салаваты жана саламы болсун):

لَا تَمْنَعُوا نِسَاءَكُمْ الْمَسَاجِدَ وَ بُيُوتُهُنَّ خَيْرٌ لَهُنَّ

«Аялдарыңарга мечитке барууга тыюу салбагыла. Бирок үйлөрү алар үчүн мечитке баргандан да жакшыраак» [2] , – деп айткан.

Ханафи мазхабынын аалымдары фитнага (бузукулукка) кабылуу коркунучу болгондуктан жаш аялдардын мечитке барып жамаат менен намаз окуусун макрух деп эсептешкен. Себеби Алла Элчиси (ага Алланын салаваты жана саламы болсун): «Үйлөрү алар үчүн мечитке баргандан да жакшыраак» , – деп айткан. Ал эми жашы улуу кары аялдардын таң жана акшам менен куптан намаздарында мечитке баруусуна уруксат берилет. Бул имам Абу Ханифанын көз карашы. Анткени ниети бузук адамдар бешим менен аср намазында көбүрөөк жүрүшөт. Акшам намазында кечки тамагын ичип, таң намазы менен куптанда уктап калышат дешет. Абу Юсуф менен Мухаммеддин пикири боюнча кары аялдар бардык парз намаздарда мечитке бара алышат [3] .

Бирок эгерде мечитте аялдар үчүн өзүнчө бөлмө болсо жана ал жерге барчу жол элге көрүнбөгөн болсо, анда барса болот. Негизги максат – аялдын абийирин сактоо жана коомдо ар кандай фитнанын чыгышына жол бербөө.

КМДБ Шариат жана фатва бөлүмү

• [1] «әл-Һидәя», 2/354. «Бадаиу ас-санаи», 1/275.

• [2] Абу Дауд, №5468.

• [3] Мавсули, «ал-Ихтияр», 1/204-207. Бурхануддин, «ал-Мухит», 2/208-209. Маргинаани, «ал-Һидәя», 1/57. Ибн Абидин, «Радду ал-мухтар», 2/307.