АЛЛА ЭЛЧИСИНИН МӨӨРҮ КАНДАЙ?

Имам әт-Термизинин «Әш-Шамайл әл-Мухаммадия» аттуу эмгегинде Пайгамбарыбыздын (ага Алланын салаваты менен саламы болсун) сырткы келбети сүрөттөлүп, эки жаурындын ортосунда пайгамбарлык мөөрү болгону айтылат. Пайгамбарлык мөөрү — көгүчкөндүн жумурткасындай чоңдукта, кызыл түстө, жумуру денеден чыгып турган эт бөлүгү. Бул мөөр Пайгамбарыбыздын чыныгы пайгамбар экенине далил болгон.

Бул тууралуу аалымдардын баары бир пикирде. Бирок «Пайгамбарлык мөөрү Пайгамбарыбыз төрөлгөндө эле бар беле же кийин пайда болгонбу?» деген суроодо аалымдардын ортосунда пикир келишпестик бар. Туурараагы, бул мөөр Пайгамбарыбыздын (ага Алланын салаваты менен саламы болсун) көкүрөгү жарылып, жүрөгүндөгү кара кан алынып, замзам суусу менен жуулгандан кийин, эки жаурындын ортосуна басылган. Эки жаурындын ортосу деп айтылганы менен, изилдөөчү аалымдар сол жаурынга жакын, жүрөк тарапта экенин белгилешкен.

Бул мөөр мурдагы түшүрүлгөн китептерде Пайгамбарыбыздын (ага Алланын салаваты менен саламы болсун) белгилеринин бири катары айтылган. Китеп ээлеринин арасындагы билимдүү адамдар бул мөөрдү жакшы билишкен. Айрымдары ушул белгини көрүп, ыйман келтирип мусулман болушкан. Пайгамбарлык мөөрү тууралуу бир нече хадистер бар. Алардын айрымдарына токтолсок:

1. Сайб бин Язид (Алла андан ыраазы болсун) мындай дейт: «Мени таежем Пайгамбарыбызга алып барып, "Оо, Алланын элчиси! Жиеним ооруп жүрөт", – деди. Ошондо Пайгамбарыбыз башымды сылап, мага дуба кылды. Анан даарат алып, калган суусун ичтим да, арка жагына өтүп турдум. Ошондо эки жаурындын ортосундагы мөөрдү көрдүм. Ал какылдык жумурткасындай чоңдукта эле»

   Бул хадистин түшүндүрмөсүндө Сайб бин Язид (Алла андан ыраазы болсун) Пайгамбарыбыздын (ага Алланын салаваты менен саламы болсун) дубасынын берекеси менен 94 жыл жашап, белин бүкпөй дүйнөдөн өткөнү айтылат.

2. Жабир бин Самурадан (Алла андан ыраазы болсун) жеткен риваятта: «Пайгамбарыбыздын эки жаурындын ортосунда көгүчкөндүн жумурткасындай кызыл мөөрдү көрдүм», – деп айтылат.

3. Бурайдадан (Алла андан ыраазы болсун) келген риваятта мындай делет: «Пайгамбарыбыз (ага Алланын салаваты менен саламы болсун) Мадинага көчүп келгенде Салман Фариси (Алла андан ыраазы болсун) Пайгамбарыбызга келип, дасторконго жаңы бышкан курма койду. Пайгамбарыбыз: "Оо, Салман. Бул эмне?" – деп сурады. Салман: "Бул Сизге жана сахабаларга садака", – деди. Пайгамбарыбыз: "Аны алып кет, Биз садака жебейбиз", – деди. Эртеси дагы курма алып келип, Пайгамбарыбыздын алдына койду. "Бул эмне?" деп сураганда, "Сизге белек" деп жооп берди. Анда Пайгамбарыбыз сахабаларына: "Кол сунуп, курмадан алгыла", – деди. Кийин аркасындагы мөөрдү көрүп, Салман (Алла андан ыраазы болсун) ыйман келтирди.

Бул Пайгамбарыбыздын белгисин Салманга мунахий устаты айткан болчу. Ал Хижаз тараптан бир пайгамбар чыга турганын, ал белек алса да, садака албай турганын жана эки жаурындын ортосунда мөөрү болорун айткан. Салман Пайгамбарыбыздын садака жебегенин көрүп, бул пайгамбарлыктын биринчи белгиси экенин түшүнгөн. Курманы белек катары бергенде, андан даам татып жатканын көрүп, экинчи белгини билген. Акыры эки жаурындын ортосундагы мөөрдү көрүп, ыйман келтирген. Жыйынтыктап айтканда, бул мөөр Пайгамбарыбыздын чыныгы пайгамбар экенине далил. Анткени ал мурдагы пайгамбарларга түшкөн китептерде айтылган. Бул мөөр сол жаурынга жакын, жүрөк тушунда жайгашкан. Көлөмү көгүчкөндүн жумурткасындай, көпчүлүк аалымдардын айтымында, терисинин түсүндөй болгон. Көпчүлүк аалымдардын айтымында, Пайгамбарыбыздын көкүрөгү жарылып, жүрөгүндөгү кара кан (шайтандык үлүш) алынгандан кийин, жүрөгү руханий хикмат менен толтурулуп, ушул мөөр басылган. Алла Таала Билүүчү!

Медет КУРСАКОВ,

«Иман» журналы, №9, 2023-жыл