Намаз убактысыАниматор деп ар кандай иш-чараларда түрдүү каармандардын образын жараткан артистти айтышат. Адистердин пикиринде, жакшы аниматор болуу үчүн психологиялык байкоочулук, акыл-парасат, ички маданият жана тарбия, актердук чеберчилик, ырдоо же бийлей билүү жөндөмү, ораторлук өнөрү болушу керек.
Аниматор конокторду тосуп алуу жана алардын маанайын көтөрүү кызматын аткарат. Азыркы учурда аниматорлук кызмат мейманкана, клуб, шаар, майрамдар жана туристтерге арналган багыттарда кеңири тараган. Алар ар кандай корпоративдик кечелерди, сынактарды, эстафеталарды жана кызыктуу оюн-зоокторду өткөрүүгө жардам беришет.
Шарият боюнча аниматор болуп иштөө үчүн төмөнкү шарттар сакталышы керек:
1. Калп айтпоо, алдабоо. Пайгамбарыбыз (ага Алланын салаваты жана саламы болсун): «Элди күлдүрүү үчүн калп айткан адамга азап, азап жана азап болсун!» – деген (Ахмад). Ибн Масъуд (Алла андан ыраазы болсун): «Чын болобу, тамаша болобу, калп айтууга болбойт. Балдарыңа бир нерсе убада кылсаңар, сөзсүз аткарыгыла», – деген.
2. Себепсиз бирөөнү күнөөлөбөө, шылдыңдабоо. Алла Таала: «Араңардан бир коом башка бир коомду шылдыңдабасын», «Бир-бириңерди кемсинтпегиле, намысына тийген лакап ат койбогула» , – деп буюрган («Хужурат» сүрөсү, 11-аят).
3. Жаныбарлардын кыймылын же үнүн туурабоо. Мисалы, иттей үрүү, эшектей акыруу. Себеби Алла Таала жаман адамды итке жана эшекке окшотуп, анын төмөн деңгээлде экенин көрсөткөн. Куранда: «Бирок ал жерге (бул дүйнөгө) жабышып, напсисине ээрчиди. Анын мисалы итке окшош» («Аъраф» сүрөсү, 176-аят), «Тауратты көтөрүп, бирок аны татыктуу алып жүрбөгөндөрдүн мисалы – китеп көтөргөн эшекке окшош» («Жума» сүрөсү, 5-аят), – деп айтылат.
4. Динди жаман көрсөтпөө. Кандай шартта болбосун, мусулман адам өз динин, Пайгамбарын, китебин, дин аалымдарын коргошу керек. Алла Таала: «Эгер алардан эмне үчүн шылдыңдап, мазактаганы тууралуу сурасаң, алар: “Биз жөн гана сүйлөшүп, тамашалашып жатканбыз”, – дешет. (Аларга): “Демек, силер Алланы, аяттарын жана Пайгамбарын шылдыңдап жатасыңарбы?!” – деп айт. (Эй, эки жүздүүлөр!) Кечирим сурап актанбагыла. Чынында, силер “ишендик” деп ооз менен айттыңар, бирок жүрөгүңөрдө кудуретсиздикти жашырдыңар» , – деген («Тавба» сүрөсү, 65-66-аяттар).
Муну баш кийим, сакал, жоолук жана башка мусулмандык атрибуттар менен сүннөт амалдарды да кошсо болот.
5. Эркек аялга, аял эркекке же динсиз адамга окшобошу керек. Пайгамбарыбыз (ага Алланын салаваты жана саламы болсун): «Ким кайсы коомго окшошсо, ал ошолордон болот» , – деген (Абу Дауд). Ошондой эле Пайгамбарыбыз (ага Алланын салаваты жана саламы болсун) өзүн аялдарга окшоткон эркектерди жана өзүн эркектерге окшоткон аялдарды каргаган (Бухари).
6. Уятсыздык кылбоо, адепсиз сөз сүйлөбөө. Пайгамбарыбыз (ага Алланын салаваты жана саламы болсун): «Алла уятсыздыкты (уят иш кылуу жана адепсиз сөз айтуу) жек көрөт» , – деген (Ахмад).
Даярдаган Хасан АМАНКУЛ
Бул мазмун жасалма интеллекттин жардамы менен даярдалып, редактор текшерген.