БАЛАНЫН ИЧИНЕ ЖИН КИРИШИ МҮМКҮНБҮ?

Жин – адам менен периште сыяктуу Алланын жараткан макулуктары. Алардын арасында жакшы жана жаман жиндер бар. Жакшы (мусулман) жиндер Пайгамбарыбызга (ага Алланын саламы жана салаваты болсун) «Биз адамдарга эч кандай зыян кылбайбыз, бирок адам өзү билбестик менен бизге тийсе, ошого жооп кайтарышыбыз мүмкүн» деп убада беришкен. Жаман (каапыр) жиндер болсо, адам баласына ар кандай жолдор менен зыян келтирүүгө аракет кылышат.

Шайтан – «алыстатылган», «чектен чыккан» деген маанини билдирет жана жинге байланыштуу айтылат. Жин-шайтандар көбүнчө ээн талаа, кир жерлерде жүрүшөт. Күн батканда жер бетине тарай башташат. Ошондуктан Пайгамбарыбыз (ага Алланын саламы жана салаваты болсун) мындай насаат айткан:

«Күн батарда балдарыңарды жаныңарга жакын кармагыла! Анткени ушул маалда жер бетинде шайтандар тарайт. Түн киргенден кийин аларды (балдарды) кое берсеңер болот» (Бухари, Муслим).

Көпчүлүк аалымдардын пикири боюнча, жин каалаган адамга жакындап, тийип, ичине кирип, анын денесин ээлеп алышы мүмкүн. Куран Керимде:

«Сүткорлук кылгандар шайтан урган жинди адамдай (көрүнүп) турушат», – деп айтылат («Бакара» сүрөсү, 275-аят).

«Жинди» дегенде жин тийген эмес, жиндин таасирине кабылган, башкача айтканда, жин кирген адам тууралуу айтылууда. Жиндин адамга тийишинин көп жолдору бар. Анын так белгилери жок. Ар кандай жана ар түрдүү себептер болушу мүмкүн. Мисалы, эшик алдына кир суу төгүү, талаада түнөп калуу, таштандыга басуу, малдын сөөгүн тепкилөө, күнөө кылуу же сыйкырлануу сыяктуу себептер менен жин тийиши мүмкүн.

Орунсуз күлүү же ыйлоо, Куран окуганда ички каршылык сезүү, акыл-эстин кемтиги, булчуңдардын түйүлүшү, уйкусуздук, кир жерде жүрүү сыяктуу белгилер жин кирген адамда байкалышы мүмкүн.

Бирок жин адамдын ичине кире алат экен деп, анын баарына күчү жетет деп коркуунун кереги жок. Тескерисинче, мусулман адам жин-шайтан зыяндарынан сактануунун жолдорун издеши керек.

Алла Тааланы эстеп, зикир кылуу – жин-шайтанга каршы эң күчтүү жана ишенимдүү курал. Айрыкча, «Фатиха», «Кафирун», «Ыхлас», «Фалак», «Нас» сүрөлөрү менен Курси аятын окуунун пайдасы чоң. Ошондой эле, Аллага таянып, бардык ишинде чын дилинен Ага ишенүү, тамактанарда бисмилла айтуу, дайыма даараттуу жүрүү, жуунуу, өзүнө дем салуу сыяктуу иштер балээден сактоого же андан куткарууга жардам берет. Ошондой эле жындан коргонуу үчүн Пайгамбарыбыз (ага Алланын саламы жана салаваты болсун) үйрөткөн эртең менен жана кечки сүннөт дубаларды окуп жүрүү керек.

Куран Керимде:

«Менин кулдарыма сенин эч кандай таасириң жүрбөйт. Сен өзүнө ээрчиген адашкан азгырылгандарга гана таасир кыла аласың», – деп айтылат («Хижр» сүрөсү, 42-аят).

Демек, шайтан Алла Тааланы эстеп, ибадат кылган адамга жакындай албайт.

Пайгамбарыбыз (ага Алланын саламы жана салаваты болсун) неберелери Хасан менен Хусейнди шайтан жана уулуу жаныбарлардын, көз тийүүдөн Алладан коргоосун сурап, дуба кылчу (Бухари).

Хасан АМАНКУЛ,

Шарият жана фатва бөлүмүнүн жетекчисинин орун басары,

«Мунара» гезити, №15, 2020-жыл