БРЕКЕТ САЛУУГА БОЛОБУ?

Негизи ар бир адам өзүнчө сулуу, өзгөчө кооз жаратылган. Алла Таала Куранда:

«Шексиз, Биз адам баласын эң кооз, эң мыкты бейнеде жараттык», – деп айткан («Тин» сүрөсү, 4-аят).

Ошондуктан ар бир адам өзүнүн башка органдары сыяктуу эле тишинин да түз жана кооз болушун каалайт. Азыркы учурда тишти түздөө үчүн жаңы ортотехнологиялар колдонулат. Алар алынуучу-салынуучу тиш протездери, тиш пластинкалары жана брекет. Ошондой эле брекет тиш ооруларынын коркунучун азайтат, кызыл эт ооруларынын мүмкүнчүлүгүн төмөндөтөт, сөздөрдүн так айтылышын камсыздайт, беттин сулуулугун арттырат жана дем алууну жакшыртат.

Хадистерде Пайгамбарыбыз (ага Алланын салаваты жана саламы болсун) өз тишине өзгөчө кам көргөнү айтылат. Бир жолу ал:

«Эгер үммөтүмө кыйынчылык болбогондо, мен аларга ар бир намазда тишин тазалоону буйрумакмын»

, – деген (Бухари жана Муслим). Алла элчиси (ага Алланын салаваты жана саламы болсун) үйүнөн чыкканда да, үйүнө кайтып келгенде да жана ар бир намаздын алдында тишин тазалаган, ошондой эле түнкү тахажжуд намазынан мурда тиш тазалоону буйруган, анткени периштелер жагымдуу жытка жакын болушат экен.

Брекет салуу ден соолук үчүн да маанилүү. Анткени ал кооз жылмаюуга жана карыганда тиштин толук сакталышына жардам берет.

Адистердин айтымында, тиштин көлөмү, тиш тиштеши, жайгашуусу жана ооз көңдөйүнүн параметрлери кызыл эттин, ал тургай ашказан менен ичегинин ден соолугуна таасир этет. Бирок, соо тиш – Алланын чоң белеги экени талашсыз.

Дарылануу, кемчилигин жашыруу жана кооз көрүнүү максатында тишине брекет салдырып, кыйшык тишин түздөөгө шариат уруксат берет. Себеби Алла элчиси (ага Алланын салаваты жана саламы болсун):

«Эй, Алланын кулдары, дарыланыңар! Анткени Алла оору да, даары да жараткан»

, – деген (Тирмизи, Ибн Мажа).

Брекет салдырып, кыйшык тишин түздөө, калыбына келтирүү – Алланын жараткан келбетин өзгөртүү болуп эсептелбейт. Брекет салдырган адам күнөөкөр болбойт. Ошондой эле брекет салуу даарат менен гусулга тоскоол болбойт.