ДЕНЕГЕ ТАТУ САЛУҒА БОЛА МА?

Эзелки Греция менен Римде кулдарды жана кылмышкерлерди таануу үчүн атайын татуировка салышчу. Азия, Африка жана Америкадагы айрым жапайы элдер менен уруулардын мүчөлөрү да денесине ар кандай оймо-чиймелерди түшүрүшкөн. Азыркы учурда жаштар арасында денеге ийне менен жазуу же сүрөт (татуировка) түшүрүү модага айланып баратат.

Татуировка – бул теринин астына боёк киргизүү жолу менен жасалган жазуулар же сүрөттөр. Ислам дининде денеге татуировка түшүрүүгө тыюу салынган. Себеби Абдулла ибн Омардан (Алла андан ыраазы болсун) жеткен хадисте:

«Пайгамбарыбыз (ага Алланын салаваты жана саламы болсун) өзү жана башкалар үчүн чач коштурган, өзү жана башкаларга татуировка түшүргөн адамдарга каргыш айткан», – деп айтылат (Бухари, Муслим).

Мындан тышкары, бүгүнкү күндө татуировканын зыяндуулугу илимий изилдөөлөр менен да далилденген. Мисалы, денеге сүрөт түшүрүүчү ийненин таза болбошу же студиялардын санитардык талаптарга жооп бербеши ар кандай жугуштуу ооруларга алып келет.

Экинчиден, колдонулган боёктордун курамында коргошун, мышьяк жана башка уулуу заттар болушу мүмкүн. Алар адамды өтө кооптуу шишик ооруларына чалдыктырат. Зыяндуу боёктор, ал тургай, адамдын гендик түзүлүшүнө да залакасын тийгизиши мүмкүн. Татуировканын айынан адамдар теринин рагы, экзема жана аллергия сыяктуу ооруларга көп кабылышат.

Демек, денеге татуировка түшүрүү улуттук менталитетибизге, түшүнүк-караштарыбызга каршы келгени менен бирге, ар бир адамдын саламаттыгына да коркунуч туудурарын түшүнүүбүз керек. Шарият боюнча ар бир адам өзүнүн ден соолугуна жана коопсуздугуна жоопкерчилик менен мамиле кылууга милдеттүү.

Бирок айрым аалымдардын пикири боюнча төмөнкү шарттарда гана денеге жазуу же сүрөт түшүрүүгө уруксат берилет:

1. Оймо же сүрөт денеге сиңип, туруктуу калбашы, убакыт өткөн сайын өчүшү керек;

2. Жазуу суунун териге тийишине тоскоол болбошу шарт;

3. Уятсыз жазуулар же сүрөттөр болбошу керек;

4. Сүрөттө терс чакырыктар, жалган идеология же адашкан агымдардын белгилери болбошу керек;

5. Чиймеде тирүү жандыктын сүрөтү болбошу керек;

6. Денеге Алла Тааланын ысымдары же Куран аяттары жазылбашы керек;

7. Жазуу аят (уят) жерлерге колдонулбашы шарт (Фатауа шаргия, шейх Ахмад Шариф ан-Насаған).