Этек кири же төрөттөн кийинки аял мечитке кирсе болобу?

Ислам аалымдарынын басымдуу бөлүгүнүн пикиринде, аялдардын этек кири же төрөттөн кийинки (нихас) абалында мечитке кирүүсү жаиз эмес. (Мевсили, әл-Ихтияр, 1/13; Меввак, әт-Таж, 1/552; Ширбини, Муғни’л-мухтаж, 1/279)

Этек кири жана төрөттөн кийинки абал шариатта өкүм боюнча тазалыксыздык деп эсептелип, ибадаттарга тоскоолдук кылат. Мечиттер да ибадат жайы болуп саналат. Пайгамбарыбыз (с.а.в.) мындай деген: “Мен этек кири келген аялдын жана жунуп адамдын мечитке кирүүсүн/мечитте болуусун халал деп эсептебейм.” (Абу Давуд, Тахарат, 90 [232]; Ибн Хузейма, әс-Сахих, 2/284 [1327]), “Мечит этек кири келген аялга жана жунупка халал эмес.” (Ибн Мажа, Тахарат, 126 [645]). Кээ бир аалымдар зарылчылык болгондо, мисалы, мечиттеги бир буюмду алуу үчүн же мечит аркылуу өтүү эң жакын жол болсо, этек кири келген аялдын мечитке кирүүсүнө же ичинен өтүүсүнө уруксат беришкен. (Ибн Кудама, әл-Мугни, 1/107; Ширбини, Муғни’л-мухтаж, 1/279) Ханафийлер да зарылчылык болгондо жунуп адам таяммум алып, мечиттен өтүүсүнө жана зарылчылыкка жараша кыска убакыт калышына уруксат беришкен. (Касани, Беда’и, 1/38) Ханбали мазхабынын бир көз карашына ылайык, жунуп, этек кири же төрөттөн кийинки аялдар намаздын дааратын алышса, мечитте боло алышат. (Мердави, әл-Инсаф, 1/347-348) Захирийлердин пикиринде болсо, этек кири келген аял мечитке кирип, ичинде боло алат. (Ибн Хазм, әл-Мухалла, 1/400-402) Зарылчылык болгондо бул көз караштар менен да амал кылууга болот.

Этек кири же төрөттөн кийинки аялдарга байланыштуу бул өкүмдөр дубал же башка нерсе менен курчалган, мечит катары курулган жана ичинде итикаф кылууга болуучу жайларга тиешелүү. Ошондуктан мечиттин короосу же кошумча жайларында болуп, абалга жараша имамга кошулууга мүмкүн болгон жерлер мечиттен өзүнчө каралат. Бул жерлер тууралуу Ханафий жана Ханбали мазхабдарынын туура көз карашына ылайык, мечиттин өкүмдөрүнө баш ийбейт. (Ибн Абидин, Реддул-мухтар, 1/171; Ибн Кудама, әл-Мугни, 3/196)

Булак: T.C. Diyanet İşleri Başkanlığı, Din İşleri Yüksek Kurulu