ФГДС (шланг жутуу) текшерүүсү орозону бузабы?

Жалпысынан алганда, шланг жутуу орозону бузбайт. Себеби, орозону бузуш үчүн шланг толугу менен ичке кириши керек. Бул учурда болсо, шлангдын бир бөлүгү сыртта калат. Бирок, эгер шланг аркылуу ашказанга бир нерсе кирсе, анда орозо бузулат.

Имам Ибн Абидин: «Эгер адам жыгач же учуна тамак байланган жип жутса, анын бир учу сыртта калып жана заттан ичте бир бөлүгү калбаса орозо бузулбайт. Себеби орозо бузулушунун шарты – ичте калуу» [1] , – деген.

Ошондуктан, эгер шлангга дары сүйкөп, жуттурса жана дарынын айрым бөлүктөрү ичте калса, орозосу бузулуп, бир күн казы кармайт.

«Рамазан орозосуна байланыштуу фатвалар» китебинен

[1] «Хашия Ибн Абидин», 3/369.