Хажат намазы кантип окулат?

Мусулман адам, керектүү нерсесине жетүү үчүн Аллах үйрөткөн себептерди жана мыйзамдарды колдон келгенче аткарышы керек жана натыйжасын Аллахтан күтүшү зарыл. Ошону менен бирге, акыретке же дүйнөгө байланыштуу каалоосу орундалышын тилеп, Аллах ыраазылыгы үчүн намаз окуусу да ылайыктуу. Окула турган бул намаз “Хажат намазы” деп аталат. Бул тууралуу Расулуллах (с.а.с.) мындай деген: “Бир адам, керектүү нерсесин Аллахтан же башка бирөөнөн сурагысы келсе, алгач жакшыча даарат алсын, андан соң эки рекет намаз окусун. Андан кийин Аллахты эскерип, Пайгамбарга салават айтсын жана мындай дуа кылсын:

لاَ إِلَهَ إِلاَّ اللَّهُ الحَلِيمُ الكَرِيمُ، سُبْحَانَ اللهِ رَبِّ العَرْشِ العَظِيمِ، الحَمْدُ لِلَّهِ رَبِّ العَالَمِينَ، أَسْأَلُكَ مُوجِبَاتِ رَحْمَتِكَ وَعَزَائِمَ مَغْفِرَتِكَ وَالغَنِيمَةَ مِنْ كُلِّ بِرٍّ وَالسَّلاَمَةَ مِنْ كُلِّ إِثْمٍ لاَ تَدَعْ لِي ذَنْبًا إِلاَّ غَفَرْتَهُ وَلاَ هَمًّا إِلاَّ فَرَّجْتَهُ وَلاَ حَاجَةً هِيَ لَكَ رِضًا إِلاَّ قَضَيْتَهَا يَا أَرْحَمَ الرَّاحِمِينَ.

Жумшак жана жоомарт Аллахтан башка илах жок. Улуу Арштын Ээси болгон Аллахты бардык кемчиликтерден аруулайм. Бардык мактоо ааламдардын Ээси Аллахка таандык. Рахматыңа себеп боло турган амалдарды, кечиримиңе жеткирчү себептерди, бардык жакшылыктарды жана бардык күнөөдөн куткарууну Сенден сурайм. Кечирбеген күнөөмдү, жоюлбаган кайгымды калтырба! Ыраазычылыгыңа ылайык болгон бардык каалоолорумду кабыл кыл!” (Тирмизи, Витир, 348 [479]; Ибн Мажа, Икаметүс-салават, 189 [1384])

Хажат намазы төрт же эки рекет болуп окулушу мүмкүн. Он эки рекет окулушу мүмкүн деген риваят да бар. Бул намазды төрт рекет окуй турган адам, биринчи рекетинде Фатиха сүрөсүнөн кийин үч жолу Аятүл-күрси, калган үч рекетинде ар биринде бирден Фатиха, Ихлас, Фалак жана Нас сүрөлөрүн окуйт. Андан кийин жогоруда айтылган дуаны кылат. (Ибн Абидин, Реддүл-мухтар, 2/28)

Булак: T.C. Diyanet İşleri Başkanlığı, Din İşleri Yüksek Kurulu