Жасалган сооп иш же окулган Курандын сообу каза болгон адамга багышталса болобу?

Жасалган ибадаттын жана сооп иштердин сообун башка бирөөгө багыштоо жаиз. Адам окуган Куран-и Каримдин, кылган хатминин же жасаган сооп ишинин сообун башка бирөөгө багыштай алат. Сооп багышталган адам тирүү болобу же каза болгон болобу, ага бул сооп жетет деп үмүт кылынат. Себеби Пайгамбарыбыз (с.а.с.) жаназага Фатиха сүрөсүн окуган жана окууну сунуштаган (Ибн Мажа, Жаназа, 22 [1495, 1496]), ошондой эле Абдуллах ибн Омар (р.а.) каза болгондордун рухуна Баккара сүрөсүнөн окууну жакшы көргөнү риваят кылынган (Бейхаки, эс-Сунанул-кубра, 4/93 [7068]). Башка бирөөнүн багыштаган сообу менен адамдын өз мойнундагы ибадат карыздары төлөнбөсө да, булар анын сообунун көбөйүшүнө жана даражасынын жогорулашына себеп болушу мүмкүн.

Бани Салама уруусунан бир адам ата-энеси каза болгондон кийин аларга жакшылык кыла алабы же жокпу деп сураганда, Пайгамбарыбыз (с.а.с.) “Ооба, аларга рахмат тилөө, алар үчүн истиğфар кылуу, осуяттарын аткаруу, туугандары менен мамиле кылып, аларга тиешелүү милдеттерди аткаруу, досторуна урмат көрсөтүп, сый-урмат кылуу” (Абу Давуд, Адаб, 128 [5142]; Ибн Мажа, Адаб, 2 [3664]) деп жооп берген.

Апасы капысынан каза болуп, эгер сүйлөй алганда садака берүүнү осуят кылмак деп ойлогон сахаба апасынын атынан садака берсе сообу жетеби деп сураганда, “Ооба, жетет. Анын атынан садака бер” (Бухари, Васая, 19 [2760]; Муслим, Закат, 51 [1004]) деп жооп беришкен.

Булак: T.C. Diyanet İşleri Başkanlığı, Din İşleri Yüksek Kurulu