КАДИР ТҮНҮНДӨ ЭМНЕ КЫЛУУ КЕРЕК?

Кадир түнүндө төмөндөгү амалдарды кылуу мустахаб болуп эсептелет:

• Намаз окуу. Пайгамбарыбыз (ага Аллахтын саламы жана салаваты болсун) айткан:

مَن قَامَ لَيْلَةَ القَدْرِ إيمَانًا واحْتِسَابًا، غُفِرَ له ما تَقَدَّمَ مِن ذَنْبِهِ

«Ким Кадир түнүн ыйман жана сооп үмүтү менен намаз окуп өткөрсө, мурдагы күнөөлөрү кечирилет» [1] , – деп айткан.

• Дуба кылуу. Айша энебизден келген риваятта ал мындай дейт: «Эй, Аллахтын элчиси! Эгер мен Кадир түнүнө туш келип калсам, кандай дуба кылсам болот?» – деп сурадым. Пайгамбарыбыз (ага Аллахтын саламы жана салаваты болсун) мындай деп жооп берген:

اللهمَّ إنك عفوٌّ تُحبُّ العفوَ فاعفُ عنِّي

«Аллахумма иннака афуун тухиббул-афва фа'фу анни (Аллахым! Сен кечиримдүүсүң, кечиргенди жакшы көрөсүң. Мени кечир)» – деп айт» [2] .

Мындан тышкары, Куран окуу, Аллахты зикир кылуу, Пайгамбарыбызга (ага Аллахтын саламы жана салаваты болсун) салават айтуу, садака берүү жана башка жакшылык иштерди кылуу да жакшы болот.

«Рамазан орозосуна байланыштуу фатвалар» китебинен

• [1] Бухари, №1901.

• [2] Тирмизи, №3513. Ибн Мажа, №7712. Ахмад, 25384.