КОСМЕТИКАЛЫК ӨНҮМДӨРДҮ КОЛДОНУУГА БОЛОБУ?

Косметика деп тазалык жана сырткы көрүнүшүн жакшыртуу үчүн колдонулган каражаттар айтылат. Алар, негизинен, чачка, териге, тырмакка жана эринге жергиликтүү колдонулат.

Эзелтен бери адамдар, айрыкча аялдар, сырткы келбетине көңүл буруп, терини карап, сулуулукту сактоого аракет кылып келишкен. Илгери адамдар жүзүн, кирпигин, кашын боёп, чачын буралап, атыр ордуна жыттуу майларды колдонушкан. Алардын курамында азыркыдай мал жана өсүмдүк майлары, эфир майлары, ар кандай чайырлар жана боёктор болгон жыттуу майлар атыр ордуна пайдаланылган.

Шарият боюнча төмөнкү шарттар аткарылса, аялдарга косметикалык каражаттарды колдонууга уруксат берилет:

• Косметиканы күйөөсүнө жакшынакай көрүнүү же аялдар жана жакын туугандарынын алдында өзүн көрктүү көрсөтүү максатында колдонуу туура. Бирок бөтөн эркектердин алдында жасанып, боёнуп жүрүүгө уруксат берилбейт. Себеби аял киши бөтөн эркектердин алдында мүмкүн болушунча жабык, оронгон абалда болуусу керек. Демек, мындай учурда аял киши кантип боёнуп жүрө алат?!

• Косметика үчүн колдонулган каражаттар хна (кызгылт сары өсүмдүк боёгу), сүрмә сыяктуу таза нерсе болушу шарт. Өлүк майын же нажас нерселерди колдонуу туура эмес. Анткени шариятта нажас жана харам нерселерди, ошондой эле адамдын мүчөсүн колдонууга тыюу салынган. Ошондуктан эти желинбеген канаттуулардын жана жаныбарлардын белогу, айрыкча чочконун майы менен белогу жана аялдын уруктук жолдошу (кош бойлуулук маалында жатында пайда болуп, эне менен ичиндеги наристенин байланышын камсыздаган маанилүү мүчө) кошулган косметикалык каражаттарды колдонбоо керек.

• Косметикалык каражаттар денеге жана териге зыянсыз болушу керек. Дароо же кийин зыяны тийген химиялык каражаттарды колдонуу туура эмес. Себеби шарият өзүңө зыян жеткирүүдөн кайтарган. Муну Пайгамбарыбыздын (ага Алланын саламы жана салаваты болсун) «Өзүңө жана башка бирөөгө зыян жеткирүүгө болбойт» деген сөзү далил (Ибн Мажа).

• Косметикалык каражаттардын таасири убактылуу болушу шарт. Себеби эринди шишитүү, жүздү катуу тарттыруу, денеге туруктуу татуировка жасоо, теринин түсүн өзгөртүү сыяктуу Алла Тааланын баштапкы жаратылышын өзгөртүү күнөө болуп эсептелет.