Курбандык чалган адам чач-тырнагын албашы керекпи?

Зул-хижжа айы башталганда, курбандык чалганга чейин чач-тырнагын албоо мустахаб болуп эсептелет.

Пайгамбарыбыз (ага Аллахтын саламы жана салаваты болсун):

مَن كانَ له ذِبْحٌ يَذْبَحُهُ فإذا أُهِلَّ هِلالُ ذِي الحِجَّةِ، فلا يَأْخُذَنَّ مِن شَعْرِهِ، ولا مِن أظْفارِهِ شيئًا حتَّى يُضَحِّيَ

«Зул-Хижжанын алгачкы он күнү киргенде, араңарда кимдир бирөө курбандык чалууну кааласа, курбандык чалганга чейин чач-тырнагын албасын» [1] .

Бул хадистеги буйрук сөз уажып эмес, мустахабды билдирет [2] . Бул жерде «чач-тырнагын албасын» дегендин негизги хикмети – тозоктон куткарылганга чейин денесинен эч нерсе алынбай толук бойдон калтыруу же ажылыктагы ихрам кийгендерге окшошуу максаты бар [3] .

Ошондуктан курбандык чалууну ниет кылган адам чач-тырнагын ала берсе да болот [4] . Себеби Айша энебизден жеткен риваятта ал мындай дейт:

كنت أفتل قلائد هدي رسول الله صلى الله عليه وسلم بيدي، ثم يبعث بها وما يمسك عن شيء، مما يمسك عنه المحرم، حتى ينحر هديه

«Мен Пайгамбарыбыздын (ага Аллахтын саламы жана салаваты болсун) курбандыгына тагылуучу алканы өз колум менен даярдачумун. Аллахтын элчиси аны (Меккеге) жөнөтүп, курбандыгы чалынганга чейин ихрам кийгендерге тыюу салынган нерселерден тыйылчу эмес» [5] .

КМДБ Шариат жана фатва бөлүмү

• [1] Муслим, №1977

• [2] Ибн Абидин, «Радду ал-мухтар», 3/66. «Ал-Ишраф аля мазхаби ал-уләмәи», 3/412.

• [3] Шавкани, «Найлу ал-автар», 5/133.

• [4] Тахауи, «Шарх маани ал-асар», 4/182.

• [5] Муслим, №1321.