Курбандык чалган адамга эмне нерсе мустахап болот?

Курбандыкка семиз жана сулуу мал тандоо. Койдун касыратылган кочкорун, кара ири мал менен туйенин ургаачысын союу жакшыраак [1].

Малдын ээси өзү союшу же жакшы союп бере турган адамга тапшыруусу мустахап. Пайгамбарыбыз (ага Алланын саламы жана салаваты болсун) кызы Фатиманын атынан курбандык чалганда, курбандык малдын жанына туруп, союлуп жаткан малдын биринчи каны тамганда мурдагы күнөөлөрү кечирилерин айткан [2].

Малды союп жатканда дуба окуу. Пайгамбарыбыз (ага Алланын саламы жана салаваты болсун) төмөнкү дубаны окуп союу жакшыраак:

وجهت وجهي للذي فطر السماوات والأرض حنيفاً وما أنا من المشركين إن صلاتي ونسكي ومحياي ومماتي لله رب العالمين لا شريك له وبذلك أمرت وأنا من المسلمين‏

Ибадатымды асман менен жерди жараткан Аллага чын ниет менен, толук баш ийип багыштадым. Мен Ага эч кимди шерик кылбайм. Менин намазым жана ибадаттарым, чындыгында, бардык ааламдардын Эгеси – Алла Таала үчүн, өмүрүм да, өлүмүм да – Анын каалоосунда. Анын шериги жок. Мен ушуга буйрулдум. Мен мусулмандарданмын [3].

Курбандык малды кыйнабай, алдын ала даярдалган өткүр бычак менен жеңил союу керек.

Малды өткүр эмес бычак менен кыйнап союу – макрух. Малдын жаны толук чыгып бүтмөйүнчө анын терисин сыйрып баштоого болбойт.

Айт күнү эртең менен тамак жебей, курбандык этинен ооз ачуу – сүннөт.

• [1] Фәтәуа Бәззазия, 3/156.

• [2] Ибн Хиббан риуаят кылган.

• [3] Муслим риуаят кылган.