Курмандык чалуунун хикмети эмне?

Курмандык чалуу ибадаты адамды акыретте чоң сыйлыкка, мол соопко жеткирет.

Пайгамбарыбыз (ага Алланын саламы жана салаваты болсун):

ما عمل ابن آدم يوم النحر أحب إلى الله من إهراق الدم، وإنه ليؤتى يوم القيامة بقرونها وأشعارها وأظلافها، وإن الدم ليقع من الله بمكان قبل أن يقع بالأرض، فطيبوا بها نفسا

«Адам баласы курман айт күнү (курмандык чалып) кан агызуудан да сүйүктүү башка иш менен Алла Таалага жакындаган эмес. Кан агызылган мал кыямат күнү мүйүздөрү, туяктары жана жүндөрү менен келет. Агызылган кан жерге түшө электе эле Алла Тааланын алдында чоң даражага жетет. Ошондуктан курмандыктарыңарды ыраазычылык менен чалыгыла» [1] – деп айткан.

Дагы бир хадисте:

بكل شعرة حسنة

Курмандыкка чалынган малдын ар бир тал жүнүнө сооп жазылары айтылган [2].

Курмандык чалуу — Алланын берген неъматтарына шүгүр кылууну билдирет. Алланын берген неъматтары өтө көп, аларды санап бүтө албайсың. Алла Таала Куранда:

وَإِنْ تَعُدُّوا نِعْمَةَ اللَّهِ لا تُحْصُوهَا

«Эгер Алланын неъматтарын санасаңар, санына жетпейсиңер» [3] — дейт. Иман, ибадат, угуу, көрүү, мал-мүлк, бала-чака — мунун баары Алланын берген неъматтары. Бул неъматтар туруктуу болушу үчүн анын шүгүрүн кылуу керек. Алланын берген неъматтарына шүгүр кылуунун бир жолу — Алла жолунда мал-мүлк сарптоо. Курмандык чалуу — Аллага шүгүр кылуунун бир көрүнүшү.

Курмандык чалуу аркылуу Алланын буйругуна баш ийүүнү жана сабырдуулукту үйрөнөбүз. Ибрахим менен Исмайил пайгамбарлардын Алланын буйругуна баш ийип, бекем турганын эстесек, алардын Аллага болгон баш ийүүсү жана сүйүүсү бардык нерседен жогору турганын көрөбүз. Албетте, бул бизди да Алланын буйругуна баш ийүүгө жана сабырдуу болууга үндөйт.

Курмандык этин үй-бүлөсүнө, жакын туугандарына, кошуналарына, досторуна жана муктаждарга бөлүштүрүү мусулмандардын арасында сүйүү жана ынтымакты күчөтөт. Бир малын курмандыкка чалып, кедей жана муктаж бир туугандарына жардам берүү аркылуу жаман сапаттарын боорукерлик, жоомарттык, кичипейилдик сыяктуу жакшы сапаттарга алмаштырат. Шариятта мындай иштерди кылуу талап кылынат жана жакшы амал деп эсептелет.

• [1] Тирмизи риваяты.

• [2] Ибн Мажа, №3118.

• [3] «Ибрахим» сүрөөсү, 34-аят.