Мест үстүнө масх кантип тартылат жана анын шарттары кандай?

Мест — бул бутту билеги менен кошо жаап турган, белгилүү сапаттагы бут кийим.

Месттердин үстүнө масх тартуунун жаиз болушу үчүн төмөнкү шарттар талап кылынат:

а) Мест бутка бутту жууп алынган даараттан кийин кийилиши керек,

б) Бутка кийилгенде кадимки басуу менен болжол менен 5 км же андан көп аралыкты басууга чыдамдуу болушу керек,

в) Месттер бутка кийилгенден кийин байлоосуз эле бутта тура ала тургандай бекем жана калың болушу керек,

г) Ар бир местте эң кичине бут манжасынын үч эселик туурасындай тешик болбошу керек,

д) Сууну сиңирип, дароо бутка өткөрбөшү керек.

Масх — бул бир түрдүү өкүмдүк тазалык болуп, дааратта бир органга, бутка кийилген местке же жарага таңылган таңгычка нымдуу кол менен тартылат; таяммумда болсо топуракка сүртүлгөн кол менен бетке жана колдорго тартылат.

Даарат алууда мест үстүнө масх тартуу Пайгамбарыбыздын (с.а.в.) сүннөтү менен далилденген. Чынында, Пайгамбарыбыздын (с.а.в.) даарат алып, месттеринин үстүнө масх тартканын билдирген көптөгөн риваяттар бар. (Бухари, Вуду’, 35, 48 [182, 202]; Муслим, Тахарат, 72-73 [272-273])

Даараттуу болуп бутуна мест кийген адам, мест кийгенден кийин даараты бузулгандан баштап, эгер жергиликтүү болсо бир күн, сапарда болсо үч күн мест үстүнө масх тарта алат. Себеби Пайгамбарыбыз (с.а.в.) сапардагы адамга үч күн үч түн, жергиликтүү адамга бир күн бир түн мест үстүнө масх тартуу мөөнөтүн белгилеген. (Муслим, Тахарат, 85 [276])

Месттерге масх тартып даарат алгандан кийин, даараттуу кезинде эки местин же бирөөсүн чечип койгон адам, дааратын бузбастан бутун жууп кайра мест кийиши керек. Эгер дааратсыз кезде местин чечсе, кайра даарат алганда бутун жуушу керек. Масх мөөнөтү бүткөндө, даараттуу болсо местин чечип бутун жуушу жетиштүү; дааратсыз болсо бутун жууп толук даарат алышы керек. (Касани, Беда’и, 1/9)

Булак: T.C. Diyanet İşleri Başkanlığı, Din İşleri Yüksek Kurulu