НАМАЗ ОКУБАГАН АДАМ КҮНӨӨКӨРБҮ?

Намаз – Ислам дининин беш түркүгүнүн экинчиси. Ибн Омардан жеткен хадисте Пайгамбарыбыз (ага Алланын салаваты жана саламы болсун): «Ислам беш нерсенин үстүндө курулган: Алладан башка кудай жок жана Мухаммед Анын элчиси экенине күбөлүк берүү, намаз окуу, зекет берүү, мүмкүнчүлүгү бар адамга ажылыкка баруу жана рамазан айында орозо кармоо», – деп айткан.

Демек, ыйман келтиргенден кийин аткарыла турган Пайгамбарыбызга (ага Алланын салаваты жана саламы болсун) жүктөлгөн эң биринчи ибадат – намаз. Ошондой эле намаз – акыретте эң биринчи сурала турган амал. Хадисте: «Кыямат күнү пенденин амалдарынан эң биринчи эсепке алынганы – намаз. Намазы туура болсо, анда ал кубанычка бөлөнүп, жакшылыкка жетет. Эгер намазы туура болбосо, анда кайгыга батып, катуу өкүнөт...» , – деп айтылган. Дагы бир хадисте: «Намаз – диндин түркүгү. Ким аны аткарса, динди бекемдеген болот. Ким аны аткарбаса, динди кыйраткан болот» , – деп айтылган.

Күндүгө беш маал намаз окуу ар бир балигатка жеткен, акыл-эси жайында болгон мусулман үчүн – парз айн. Башкача айтканда, ар бир мусулман бул ибадатты өзү аткармайынча парзы мойнунан түшпөйт. Кимде-ким ушул парз болгон намазын бул дүйнөдө аткарса, ал мойнуна жүктөлгөн милдеттен кутулуп, акыретте окуган намаздарынын сообуна ээ болот жана окуган намаздары анын жәннәткә киришине себепчи болот. Хадисте: «Жәннәттин ачкычы – намаз. Намаздын ачкычы – даарат алуу» , – деп айтылган. Ал эми ким жалкоолук кылып, намазга кайдыгер мамиле жасап, бул дүйнөдө намаз окубаса, ал адам күнөө кылган болот.

Жыйынтыктап айтканда, балигатка жеткен, акыл-эси жайында болгон мусулман эркек жана аял үчүн күнүнө беш маал намаз окуу – парз. Кыямат күнү эң биринчи сурала турган амал – намаз. Намаз окуу аркылуу мусулман адам Алла Тааланын ыраазылыгына жетсе, намаз окубаган адам Алланын буйругуна каршы чыгып, күнөө иш кылган болот. Алла Таала баарыбызды намазына бекем, толук жана үзгүлтүксүз окуган пенделерден кылсын!

Медет КУРМАШ уулу

«Иман» журналы, №10, 2024-жыл