НУМЕРОЛОГИЯ ДЕГЕН НЕ?

Табияттан тышкары күчтөргө кызыгуу – адам баласына мүнөздүү көрүнүш. Көп учурда бул аркылуу тагдырдагы жазмышты билүү, келечекти алдын ала билүү же адамдын мүнөзүн аныктоо максат кылынат. Ошолордун бири – азыр коомдо кеңири жайылып жаткан нумерология илими. Нумерология – табияттагы нерселерге, адамдарга сандардын жакшы же жаман таасир эте алары тууралуу мистикалык ишеним.

Ислам ишениминде дүйнөдөгү бардык окуялар, өзгөрүүлөр Алла Тааланын каалоосу менен гана болот. Ошондой эле, тагдырды, келечекти Алладан башка эч ким билбейт. Бул тууралуу «Ағраф» сүрөсүнүн 188-аятында айтылат:

«(Эй, Мухаммад) аларга айт: "Мен Алла каалабаса, өзүмө эч кандай пайда да, зыян да келтире албайм. Эгер мен жашыруунду (келечекти) билсем, анда дайыма пайда табып, эч качан жамандыкка учурабайт элем жана (алдын ала сактанмакмын да) башыма эч кандай жамандык да, балээ да келмек эмес", – деп айтылган.

Атактуу мусулман ойчулу Ибн Халдун «Мукаддима» эмгегинде сыйкырчылар жин-шайтанга таянарын баяндайт. Ал сыйкырчыларды бир нече түргө бөлөт. Бирөө – өз күчүнө гана ишенгендер, экинчиси – жылдыздарды же сандарды колдонгондор. Ибн Халдун биринчисинин даражасы жогору экенин айткан.

Нумерология илими толук сыйкырга кирбесе да, анын сандарга негизделгени сыйкыр менен байланышы бар экенин көрсөтөт.

Пайгамбарыбыз Мухаммад (ага Алланын салаваты жана саламы болсун): «Кимде-ким балгерге, сыйкырчыга же төлгөчүгө барып, бир нерсе сурап, анын айтканын туура деп эсептесе, анда ал Мухаммадка түшкөн нерсеге куфур кылган болот», – деген.

Ибн Халдун сандар менен кандайдыр бир божомол жасоо тууралуу: «Булардын баары туура эмес тыянактар. Алар (нумерологдор) бул ыкманы акылы толук калыптана элек адамдарды алдоо үчүн колдонушат», – деген.

Тарыхта бул илим менен алектенген кээ бир шииттик жана ашынган суфий агымдар тууралуу айтылган. «Мукаддима» китебинде бул жогорудагы топтордун жашыруунду билүүгө умтулуусунан келип чыккандыгы айтылат.

Нумерология жана ага окшош башка табияттан тышкары күчтөр менен алектенүүгө, аларга кайрылууга шариатыбыз катуу тыюу салган. Анткени, анын дүйнө турмушубузга да, акыретибизге да эч кандай пайдасы жок. Ага убакыт коротуу – куру убаракерчилик. Ошондой эле, сандардын божомолуна ишенип, Алланын кудуретине, тагдырына шек келтирүү чоң күнөө болуп эсептелет.

Хасан Аманкул,

Шариат жана пәтуа бөлүмүнүн жетекчисинин орун басары