Орозого түндө ниет кылбай же үч күн кечигип баштаса, каффарат керекпи?

Рамазан айы экенин билип туруп, орозого ниет кылбай таң аткыча, бешимге бир саат калганда да ниет кылбаса, орозосу туура болбойт.

Шейх Шамсу ал-Аимма ал-Халуани имам Абу Жафардан ушул риваятты жеткирген. Ал-Хидаяда: «Рамазан айынын бардык күнүндө орозого ниет кылбаса, орозосу туура болбойт» деп айтылган [1] .

Эгер ушундан кийин атайылап тамак жеп алса же жубайлык мамиледе болсо, каффарат милдеттүү болбойт. Себеби орозонун туура болушу үчүн ниет шарт. Ниетсиз ибадат кабыл болбойт. Ошондуктан ниет кылбай калган убакта тамак-ичимдиктен тыйылса да, орозо туткан болуп эсептелбейт. Ал күндүн казасын гана аткарат, каффарат милдеттүү эмес. Себеби каффарат, орозону атайылап бузганга гана тиешелүү. Бул жерде орозонун өзү туура эмес болуп жатат [2] .

Ошондуктан орозого түнү баштап, бешимге бир саат калганда да ниет кылбаса же эч кандай себепсиз бир-эки күн кечигип баштагандар тооба кылып, Алладан кечирим сурап, ошол күндөрдүн казасын гана аткарышат. Орозосу туура болбогондуктан каффарат милдеттүү эмес.

«Рамазан орозосуна байланыштуу фатвалар» китебинен

[1] «Ал-Фатава ат-Татархания», 2/98.

[2] «Радду ал-мухтар», 3/377.