Педофилдин диндеги жазасы кандай?

2015-жылы Алматы шаарында өткөн Казакстан мусулмандарынын диний башкармалыгынын Аалымдар Кеңешинин IX жыйынында коомдогу олуттуу маселелердин бири болгон педофилия боюнча пәтуа чыгарылган. Айрымдар педофилияны тукум куучулук оору, психикалык бузулуу же сексуалдык бузуктук катары эсептесе, көпчүлүк аны бузукулук деп санайт.

КМДБнын пәтуасында мындай деп айтылат: «Ислам дини адамдарды ырайымдуулукка, боорукерликке чакырат. Боорукерлик кыргыз элинин маданияты менен салт-санаасында өзгөчө орунга ээ болуп, ажырагыс бөлүгү болуп калган. Ал эми коомдун тынчтыгын бузган кылмыш жана уятсыздыкка Алла Таала катуу тыюу салат.

Алла Таала Куранда: «Жер бетинде тынчтык орногондон кийин бузукулук кылбагыла» («Аъраф» сүрөсү, 56-аят), «Алла бузукулук кылгандарды жакшы көрбөйт» («Маида» сүрөсү, 64-аят) деп айткан.

Азыркы коомубузда балакат жашына жете элек балдарды аңдып, аларды зордуктоого аракет кылуу, башкача айтканда, педофилия ушул аяттарда айтылган бузукулук жана уятсыздык түшүнүгүнө кирет.

Куран Керим аяттарына түшүндүрмө берген белгилүү табиин Мужахид «жер бетинде бузукулук кылгандар» деген сөзгө мындайча түшүндүрмө берет: «Бузукулук — зынаа кылуу, уурулук кылуу, адамдарды өлтүрүү, урпак менен эгин талааларын жок кылуу, бузуу» деп айткан.

Бул жийиркеничтүү кылмыштын төмөнкүдөй кесепеттери бар:

Бул аракет баланын эркинен тышкары жана коркунучтуу болгондуктан, баланын туура өсүшүнө чоң тоскоолдук жаратат. Балким өмүр бою айыккыс жыныстык ооруларга чалдыгышы мүмкүн. Балага психологиялык жактан оор таасир берет. Бала айыккыс психологиялык ооруларга кабылышы мүмкүн. Үй-бүлөнүн аброюна, кадыр-баркына чоң зыян келтирет. Келечек муундун тагдырына балта чабат.

Эгер мындай жийиркеничтүү ишке барган кылмышкер курмандыгын өлтүрсө, жазасы дагы оор болот. Ошондуктан педофилия адамзаттын табиятына каршы жана оор кылмыш болгондуктан, жазасы да өтө оор. Мусулман аалымдары мындай кылмышкерге оор жаза (өлүм ж.б.) өкүмдөрүн чыгарган. Бирок биздин өлкө секулярдуу, укуктук мамлекет болгондуктан, педофилдик кылмышка шариат өкүмдөрү эмес, кылмыш-жаза кодексиндеги жазалар берилет. Тактап айтканда, быйылдан баштап күчүнө кирген мыйзамга ылайык, педофилдер өмүр бою эркинен ажыратылат.

Хасан АМАНКУЛ,

Шариат жана пәтуа бөлүмүнүн жетекчисинин орун басары,

«Мунара» гезити, №1, 2020-жыл