РЕГРЕССОЛОГИЯ ЖӨНҮНДӨ ШАРИЯТЫБЫЗ ЭМНЕ ДЕЙТ?

Регрессология – психотерапия менен психологияда колдонулган ыкма. Бул ыкма адамдарга өткөн жашоосунда болгон окуяларды эстеп, аларды талдоого жардам берет. Регрессология азыркы учурда адамдарда кездешкен көптөгөн маселелердин түпкү себеби өткөндө, иштелбей калган эмоцияларда, жаракаттарда жана ички конфликттерде жатат деген божомолго негизделет.

Регрессологияны жаракаттар, фобиялар, коркуу сезимдери, комплекстер, ички карама-каршылыктар жана башка психологиялык көйгөйлөр менен күрөшүү үчүн колдонушат. Оорулуу менен иштөө учурунда регрессолог адамга өткөн окуялар менен байланышын калыбына келтирүүгө жана аларды терең деңгээлде иштеп чыгууга жардам берүү үчүн терең релаксация, гипноз, импульстар, кайтарым байланыш жана башка ыкмаларды колдонушу мүмкүн.

Бирок регрессология илимий чөйрөдө талаштуу тема болуп саналат. Көптөгөн илимпоздор бул ыкманы сынга алып, анын натыйжалуулугу жана бейтаптар менен иштөөдө гипноздук ыкмаларды колдонуу кооптуу болушу мүмкүн экенин, ошондой эле бул тууралуу ишенимдүү илимий далилдер жок экенин айтышат. Ошондуктан регрессологияны колдонуу үчүн психотерапия жана психология тармагында жогорку билим жана кесипкөйлүк талап кылынат.

Кээ бир регрессологдор рухтун көчүшү, адамдын өткөн жашоосу тууралуу айтып, ошол жолду жайылтышат. Бул жерде реинкарнация түшүнүгү пайда болот. Реинкарнация – адамдын жаны денеден чыккандан кийин башка денеге өтүшү же адамдын руху башка денелерге көчүп жүрүшү. Башкача айтканда, бул ишенимдеги адамдардын түшүнүгүндө адам өлгөндөн кийин анын руху башка нерсеге: адамдан адамга, адамдан жаныбарга, адамдан өсүмдүккө же жансыз нерселерге өтөт.

Чындыгында, реинкарнация түшүнүгү – Ислам динине түп-тамырынан каршы келет. Ислам дининин ишенимине такыр туура келбейт. Анткени бул ишенимдеги адамдар акыретти, Кыяматты, эсеп берүүнү, бейиш менен тозокту, кайра тирилүүнү – ушулардын баарын четке кагышат. Ислам ишенимине ылайык, адам бул дүйнөдөн өткөндөн кийин кайра кайтып келбейт, адамга жашоо бир гана жолу берилет.

Реинкарнация – акылга да, накылга да (Куран менен хадиске) каршы түшүнүк. Ошондуктан ага ишенүү адамды адашууга, кәпирликке алып барат. Мусулман адам динибизге каршы мындай түшүнүктөрдөн алыс болушу керек.

Даярдаган Хасан АМАНКУЛ,

«Мунара» гезити, №8, 2023-жыл