«Салатун-нария» кандай дуба?

«Салатун-нария» деген сөз араб тилинде «отко байланыштуу салават» деген маанини билдирет. Бул салаваттын мындай аталышын илим ээлери «салатун-нарияны көп окуу фитна (бүлүк) отун өчүрүүгө себеп болот» деп түшүндүрүшкөн.

Алла элчисине (ага Алланын салаваты жана саламы болсун) көп салават айтуу дубанын кабыл болушуна, кыйынчылыктардан кутулууга себеп экени тууралуу көптөгөн хадистер риваят кылынган. Айрыкча, Омар ибн Хаттаб (Алла андан ыраазы болсун):

«Пайгамбарыңа (ага Алланын салаваты жана саламы болсун) салават айтмайынча сенин дубаң жер менен асманда токтоп турат, андан эч нерсе жогору көтөрүлбөйт», – деген (Тирмизи).

Убай ибн Ка’б (Алла андан ыраазы болсун): «Уа, Алла элчиси, мен көп салават айтам. Ошол салаваттын канчасын сизге арнасам болот?» – деп сурайт. Ошондо Пайгамбарыбыз (ага Алланын салаваты жана саламы болсун):

«Каалаганыңча айт», – деп жооп берет (Тирмизи).

«Салатун-нария» да Алла элчисине (ага Алланын салаваты жана саламы болсун) айтылуучу салаваттардын бири. Бирок ал бир да сахих же алсыз хадисте риваят кылынган эмес. Бул белгилүү тарикат (сопулук) мектебинин жетекчиси шейх Ахмад Рифа’иден (Алла аны ырайым кылсын) жеткен, салтка айланган. Ахмад Рифа’и Ирактын Үмми Убайда айылында хижранын 512-жылы төрөлгөн. Анын осуяты боюнча, бүгүнкү күндө айрым ыкыластуу мусулмандар аны окуп жүрүшөт. Айрыкча, аны 4444 жолу окуу аркылуу Алла Тааланын жардамы менен муктаждыктар аткарылары, дубалар кабыл болору тажрыйбада сыналганы айтылат.

«Салатун-нария» мындай окулат: «Аллаһуммә, солли солатән камиләтән уә сәллим сәламән таммән алә сәйидина Мухаммадин, алләзи тәнхаллу биһил уқоду уә тәнфарижу биһил куробу уә туқзо биһил хауаижу уә туналу биһир роғоибу уә хуснул хоуатими уә юстасқол ғомаму би уәжһиһил карими уә алә алиһи уә сохбиһи фи кулли ләмхатин уә нәфасин би адади кулли маълумин лака».

Мааниси: «Уа, Алла! Биздин кожобуз Мухаммадга толук салават жана эң сонун салам жолдо! Анын себептүү кыйынчылыктар чечилет, кайгылар кетет, муктаждыктар аткарылат, тилектер орундалат, жакшы иштер соңуна чыгат. Аса Мээримдүү Алланын каалоосу менен жамгыр жаайт. Ошондой эле ар бир көз ирмемде жана ар бир демде Өзүңө маалым санда анын үй-бүлөсүнө жана сахабаларына да ырайым жана тынчтык насип эт!».

Ошентсе да башка салаваттарды да айтып, Пайгамбарыбызга (ага Алланын салаваты жана саламы болсун) дуба кылып, салам жолдоо аркылуу Алла Тааланын жардамына, мээримине үмүт кылса болот.