САЛАУАТ АЙТУДЫН МАЗМУНУ ЭМНЕДЕ?

Алла Таала Курандын «Ахзаб» сүрөсүнүн 56-аятында мындай дейт: «Чынында, Алла жана Анын периштелери Пайгамбарга салауат айтышат (Алладан – ырайым, периштелерден – дуба, кечирим). Эй, ыйман келтиргендер! Силер да ага (Пайгамбарга) салауат жана саламаттык тилегиле!» – деп айткан. Алла Таала Өзүнүн улуулугу менен, сансыз периштелердин Пайгамбарыбызга (ага Алланын салауаты жана саламы болсун) салауат айтышынын жана ыйман келтирген момундарга да салауат айтууну буйруусунун сыры эмнеде?

Биринчи, Пайгамбарыбызды (ага Алланын салауаты жана саламы болсун) даңктап, Алла Тааланын алдындагы аброюн көтөрүп, артыкчылыгын көрсөтүү жана анын динин башка диндерден үстөм кылуу. Алла Таала «Сафф» сүрөсүнүн 8-аятында: «Алар (ошол залымдар) Алланын нурун ооздору (тилдери) менен өчүрүүнү каалашат. Бирок Алла каапырлар жактырбаса да, Өзүнүн нурун толук кылат» , – деп айткан.

Экинчи, канча убакыт өтсө да Пайгамбарыбыздын ысымы, даражасы эл арасында бийик болушу үчүн. Алла Таала «Шарх» сүрөсүнүн 4-аятында: «Биз сенин эсиңди, ысымыңды көтөрбөдүк беле?» – деп айткан.

Үчүнчү, биздин салауат жана саламдарыбыз Ага жеткирилет. Пайгамбарыбыз (ага Алланын салауаты жана саламы болсун) бир хадисте мындай деген: «Күндөрдүн эң жакшысы – жума күнү. Бул күнү Адам ата жаратылган жана ушул күнү дүйнөдөн өткөн. Кыямат да ушул жума күнү болот. Жума күнү мага салауат айткыла, анткени силердин салауаттарыңар мага көрсөтүлөт» , – деп айткан.

Төртүнчү, ким Пайгамбарга салауат айтса, Алла Таала ал адамга да салауат айтат. Ким Пайгамбарга салам айтса, Алла Таала ал адамга да салам жолдойт. Хадисте мындай айтылат: «Бир күнү Алланын элчисинин жүзүнөн кубаныч байкалды. Ошондо сахабалары: «Эй, Алланын элчиси! Жүзүңүздөн кубаныч көрүнүп турат», – дешти. Пайгамбарыбыз (ага Алланын салауаты жана саламы болсун) мындай деп жооп берди: «Мага периште келип: «Эй, Мухаммад! Раббиң: «Үммөтүңдөн сага ким бир жолу салауат айтса, Мен ага он салауат айтам. Үммөтүңдөн сага ким бир жолу салам айтса, Мен ага он салам жолдойм. Муну менен ыраазы болосуңбу?» – деди». Мен: «Албетте, ыраазымын», – деп жооп бердим» , – деп айткан.

Бешинчи, Алла Таала Пайгамбарыбызга салауат айткан адамдын күнөөлөрүн кечирип, даражасын көтөрөт. Хадисте мындай айтылат: «Ким мага бир жолу салауат айтса, Алла ага он салауат айтат, анын он күнөөсүн кечирет жана даражасын он эсе көтөрөт», – деп айтылган. Пайгамбарыбызга (ага Алланын салауаты жана саламы болсун) салауат айтуунун биз билген жана билбеген көптөгөн артыкчылыктары бар. Ошондуктан кайсы убакта болбосун салауатты көп айтуу – мустахаб амал.

Салауат айтуунун түрлөрү көп. Жогорудагы аят түшкөндө бир киши Пайгамбарыбызга (ага Алланын салауаты жана саламы болсун) келип: «Эй, Алланын элчиси! Сага салауатты кантип айтабыз?» – деп сураганда, ушул салауатты айткан: «اللهم صل على محمد وعلى آل محمد كما صليت على إبراهيم إنك حميد مجيد. وبارك على محمد وعلى آل محمد كما باركت على إبراهيم إنك حميد مجيد».

Пайгамбарыбыз (ага Алланын салауаты жана саламы болсун) биздин салауатыбызга муктаж эмес, тескерисинче салауат айтууга биз муктажбыз. Анткени Пайгамбарга салауат айтуу менен пенде соопко ээ болот. Алла Таала ал пендеге ырайымын төгүп, күнөөлөрүн кечирип, даражасын көтөрөт, кайгысын жеңилдетип, ырыскысын арттырат. Салауат менен башталган жана салауат менен аяктаган дубалар кабыл болот. Салауат айтуу менен пенде кыяматта Алланын элчисине (ага Алланын салауаты жана саламы болсун) эң жакын адамдардын бири болот. Хадисте мындай айтылат: «Кыяматта мага эң жакын болгон адам – мага көп салауат айткан адам» , – деп айтылган. Окумуштууларыбыз айткандай, Пайгамбарыбыз – адамзаттын эң улугу, жума – күндөрдүн мырзасы. Ошондуктан жума күнү айтылган салауаттын сообу башка убакта айтылган салауаттан артык болот. Алла Таала бардыгыбызды Пайгамбарыбызга (ага Алланын салауаты жана саламы болсун) салауат айткан, Кыямат күнү Алланын элчисине эң жакын болгон адамдардын катарына кошсун! Амин!

Медет КУРСАКОВ,

«Иман» журналы, №9 , 2023-жыл