СҮРӨТҮ БАР КИЙИМ МЕНЕН НАМАЗ ОКУУ БОЛОБУ?

Ханафи мазхабында жандуу нерсенин сүрөтү түшүрүлгөн кийим менен намаз окуу макрух деп эсептелет [1] .

Айша (ага Алла ыраазы болсун) энебизден жеткен хадисте мындай деп айтылат:

قَامَ رَسولُ اللهِ صَلَّى اللَّهُ عليه وسلَّمَ يُصَلِّي في خَمِيصَةٍ ذَاتِ أعْلَامٍ، فَنَظَرَ إلى عَلَمِهَا، فَلَمَّا قَضَى صَلَاتَهُ قالَ: اذْهَبُوا بهذِه الخَمِيصَةِ إلى أبِي جَهْمِ بنِ حُذَيْفَةَ، وائْتُونِي بأَنْبِجَانِيِّهِ، فإنَّهَا ألْهَتْنِي آنِفًا في صَلَاتِي

«Пайгамбарыбыз (ага Алланын саламы жана салаваты болсун) бир белгилүү көйнөк менен намаз окуп, ага көзү түшүп кетет. Намазын бүткөндөн кийин: «Бул көйнөктү Абу Жахимге алып барып, анын ордуна сүрөтү жок жөнөкөй көйнөктү алып келгиле. Себеби бул менин намазда көңүлүмдү бөлүп жибере жаздады» [2] , – деп айткан.

Дагы бир риваятта:

كُنْتُ أَنْظُرُ إِلَى عَلَمِهَا وَأَنَا فِي الصَّلاَةِ فَأَخَافُ أَنْ تَفْتِنَنِي

«Намаз окуп жатып көйнөктүн белгилерине көзүм түшүп кетти. Бул менин намазыма тоскоол болобу деп корктум» [3] , – деп айткан.

Белгилүү аалым, молдо Нуриддин Али ибн Султан, имам Убайдулла ибн Масгуддун «ән-Нуқая» аттуу эмгегине жазган «Фатху-Бабил-Гиная» аттуу түшүндүрмөсүндө намаздын макрухтору тууралуу мындай дейт: «Кийиминде, сажда жеринде, астында же артында эмес, алдыңкы, оң же сол тарабында жандык сүрөтү болсо макрух. Эгер (жандык сүрөтү) көзгө араң көрүнгөн өтө кичине же башы өчүрүлгөн болсо макрух эмес» [4] .

Имам ал-Маргинаани: «Сүрөтү бар кийим менен намаз окуу – макрух. Себеби бул бутка табынган адамга окшоп калат. Мындай учурда намаз макрух болсо да, намаз туура болот. Анткени намаздын шарттары жана парздары аткарылган болот» [5] , – дейт.

Ошондуктан сүрөтү же жазуусу бар кийим менен намаз окуудан алыс болуу жакшы. Окуса да намазы туура болот. Ал эми сүрөтү бар кийимдин үстүнөн башка бир өңдүү кийим кийип намаз окуса болот.

Айтуган Тойбазар,

Түндүк Казакстан облусу боюнча фатвага жооптуу адис

• [1] Хашияту әт-Тахтауи, 362.

• [2] Муслим, №556.

• [3] Сахих Бухари, №373.

• [4] Фатху баби ал-инайа бишархи китаби ан-нукая, 1/311-312.

• [5] Маргинаани, ал-Хидая, 1/166.