Сыйкыр жана дубадан коргонуу үчүн эмне кылуу керек?

Ислам дини сыйкырды чоң күнөөлөрдүн катарына кошуп, аны катуу тыюу салган. Куранда сыйкыр жасагандардын акыретте үлүшү болбой турганы жана мындай иштерден Аллага сыйынуу керектиги баса белгиленген. (эл-Бакара, 2/102; эл-Фалак, 113/4) Пайгамбар (с.а.с.) да сыйкыр жасоону жети чоң күнөөнүн катарына киргизген. (Бухари, Васая, 23 [2766]; Худуд, 44 [6857]; Муслим, Иман, 145 [89])

Жахилия доорунда сыйкыр/дуба абдан кеңири тараган болчу. Жин чакыруу, төлгө ачуу, жылдыздардан өкүм чыгаруу, жебе менен төлгө салуу, жипке түйүн байлап үйлөө сыяктуу иштер жасалчу. Мүшриктер бул көрүнүштөрдүн таасири менен Куранды да сыйкыр деп айыпташкан. (Сад, 38/4; эз-Зарият, 51/52)

Сыйкыр менен дубага каршы эң натыйжалуу чара — Аллага сыйынуу жана Ага таянуу. Пайгамбар (с.а.с.) бардык жамандыктан Аллага сыйынып, дайыма Фалак жана Нас сүрөлөрүн, ошондой эле Аятүл-Курсини окуган. (Бухари, Векалет, 10 [2311]; Фазаилүл-Куран, 10, 14 [5010, 5016-5017]) Ошондой эле ал неберелери Хасан (р.а.) жана Хусейнди (р.а.) көз тийүүдөн, сыйкыр жана башка жаман нерселерден коргоо үчүн төмөнкү дубаны окуган:

أَعُوذُ بِكَلِمَاتِ اللَّهِ التَّامَّةِ مِنْ كُلِّ شَيْطَانٍ وَهَامَّةٍ وَمِنْ كُلِّ عَيْنٍ لاَمَّةٍ

“Ар кандай шайтан, уулуу курт-кумурска жана бардык жаман көздөрдөн Алланын толук сөздөрүнө сыйынам.” (Бухари, Эхадисүл-энбия, 10 [3371]) Мындан тышкары, сыйкырга кабылдым деп ойлогон адам шыпааны Алладан үмүт кылып, ишенген адамдарына Куран окутуп, дуба кылдырса болот. Дин Иштери Жогорку Кеңеши 1979-жылдын 28-сентябрындагы 1883-номердүү токтомунда, шыпааны Алладан үмүт кылып ооруларга Куран жана шыпаага байланыштуу дубаларды окуу жаиз, элди алдоо жана белгисиз нерселерди айтуу максатында үйлөө — динге каршы экенин белгилеген.

Булак: T.C. Diyanet İşleri Başkanlığı, Din İşleri Yüksek Kurulu