Үй тиричилиги аялдын милдети болуп эсептелеби?

Суроо: Аял киши үй шыпыруу, тамак жасоо, кир жуу сыяктуу үй иштерин аткарууга милдеттүүбү?

Жооп: Жалпысынан аалымдардын айрымдары аял үй иштерин кылышы керек десе, башкалары милдеттүү эмес дешет. Бирок, Ханафи мазхабы боюнча аялдын күйөөсүнө дин жагынан кызмат кылуусу – важип[1]. Башкача айтканда, үй шыпыруу, кир жуу, тамак жасоо жана башка үй тиричилигине байланыштуу иштерди кылууга тийиш. Бул кылымдар бою салт болуп калыптанган аялдын күйөөсү алдындагы милдети болуп эсептелет[2]. Мунун далили катары Пайгамбарыбыз (ага Алланын салам-салаваты болсун) Али менен Фатиманын ортосунда калыстык кылып, талаа иштерин Алиге, үй иштерин Фатимага тапшырганы айтылат[3].

Ошондой эле, Пайгамбарыбыздын (ага Алланын салам-салаваты болсун) жана сахабалардын аялдары да үй иштерин аткарышкан[4]. Айша энебиз мындай деген:

«Пайгамбарыбыздын мисуагын, даарат суусун даярдап койчумун» [5] деген.

Абу Бакрдын кызы Асма да мындай дейт:

«Үй тиричилигинин баары менин мойнумда эле. Күйөөм Зубайрдын атына жем берип, өзүм сугарчумун»[6].

Демек, аял киши үй шыпыруу, тамак жасоо, кийим жуу сыяктуу үй ичиндеги иштерди кылууга милдеттүү. Азыркы кыз-келиндер да үй иштеринде ушул сахаба аялдарды үлгү тутуп, аны ибадаттын бир бөлүгү катары караганы туура. Муну менен күйөөсүнүн ыраазылыгына да жетет.

Эркек киши да аялга күчү жетпеген иштерди жүктөбөшү керек. Тескерисинче, мүмкүнчүлүгү болсо бош убактысында жардам берген жакшы.

• Әл-Бәдәйығу әс-санайығу фи тәртиби әш-шәрайығи, 4/192. Әл-Мәусуға әл-Фиқһия, 19/44.

• Мухаммад Абу Заһра, Әл-ахуалу әш-шахсия,166 б.

• Ибн Хажар, Фәтху әл-бәри, 9/507.

• Нәбил инб Кәмәлуддин Мухаммад Тахун. Әхкәму әл-усра фи әл-исләм, 240 б.

• Муслим риуаяты.

• Бухари, 6/157.