Зулхижжа айынын алгачкы он күнүнүн фазилети кандай?

Фәжр сүрөсүнүн 2-аятында айтылган “он түн” деген сөз, кеңири кабыл алынган түшүндүрмөгө ылайык, ажы айы болгон Зулхижжа айынын алгачкы он түнүн билдирет. (Разы, Мефатихул-гайб, 31/148) Зулхижжанын алгачкы он күнүнүн фазилетине байланыштуу, Пайгамбарыбыз (с.а.в.) мындай деген: “Аллахтын алдында ушул он күндө жасалган сооптуу амалдан да сүйүктүүраак амал жок.” Сахабалар: “Эй Аллахтын Элчиси! Аллах жолундагы жихаддан да артыкпы?” деп сурашканда, Расулуллах (с.а.в.) мындай деп жооп берген: “Ооба, Аллах жолундагы жихаддан да. Бирок малын жана жанын тобокелге салып жихадга чыгып, шейит болуп кайтып келбеген адамдын жихады өзгөчө (ал мындан артык).” (Абу Давуд, Савм, 61 [2438]; караңыз: Бухари, Идейн, 11 [969])

Зулхижжанын бул он күнүнүн фазилети ажы ибадаты ушул айда аткарылганына байланыштуу. (Ибн Хажар, Фатх, 6/110) Анткени бул күндөрдө ажы ибадатынын айрым амалдары аткарылат, айрымдары болсо (зиарат тавафы, шайтанга таш ыргытуу сыяктуу) андан кийинки ташриктин күндөрүндө жүзөгө ашырылат. Зулхижжа айынын тогузунчу күнү болгон Курман айттын арафасында кармалган орозонун да абдан сооптуу экени риваяттарда айтылган. (Муслим, Сыям, 196-197 [1162])

Булак: T.C. Diyanet İşleri Başkanlığı, Din İşleri Yüksek Kurulu