Ахуйн хэрэглээний эд зүйлс дээр Куран айатуудыг бичих (зурах) зөв үү?

Куран бол Аллахын үг бөгөөд мусульман хүний эрхэмлэн дээдлэх ном юм. Куран болон шариатын бэлгэдлийг хүндэтгэх нь бүх мусульман хүний үүрэг. Хэрвээ хүн Кураныг хүндэтгэвэл Аллахыг хүндэтгэсэн хэрэг, харин дорд үзвэл Аллахыг дорд үзсэнд тооцогдоно.

Аллах Таала Куранд ингэж айлдсан:

ذَلِكَ وَمَنْ يُعَظِّمْ شَعَائِرَ اللَّهِ فَإِنَّهَا مِنْ تَقْوَى الْقُلُوبِ

"Энэ бол Аллахын бэлгэдлийг эрхэмлэн дээдэлдэг хүн бол яах аргагүй зүрхний такуагийн шинж" [1] .

Омар (Аллах түүнд сэтгэл хангалуун байх болтугай): "Кураныг эрхэмлэ" [2] гэжээ.

Кураны зарим айатыг аяга таваг зэрэг эд зүйлс дээр бичих асуудлын хувьд, үүний шийдэл нь хүний санаа зорилготой холбоотой. Хэрвээ Кураныг доромжлох зорилготой бол энэ нь хатуу хориглогдоно. Учир нь энэ нь ариун бэлгэдлийг үл тоомсорлох, нэр хүндийг нь унагаах явдал юм. Мусульманчууд Куран Каримыг эрхэмлэн дээдэлж, хүндэтгэн хадгалах ёстой. Тиймээс Кураныг доромжлох байдалд хүргэх аливаа үйлдлээс зайлсхийх хэрэгтэй.

Пайгамбар (Аллахын энх амгалан, ерөөл түүнд байх болтугай)-ын хадист Кураныг газар, хувцас, дэвсгэр, дэр зэрэгт бичихийг хориглосон баримтууд бий. Тэдний нэг нь Амр ибн Шуғайбаас уламжлагдсан риваят:

"Пайгамбар (Аллахын энх амгалан, ерөөл түүнд байх болтугай) Кураныг газар бичихийг хориглосон" [3] гэжээ.

Учир нь газар дээр хүн бүр хөлөөрөө гишгэдэг тул тэнд бичсэн Куран дорд үзэгдэх аюултай. Энэ нь Кураныг хүндэтгэхгүйд хүргэнэ. Харин энэ нь их нүгэл [4] юм.

Бүр зарим эрдэмтэд доромжлолд хүргэх эрсдэлээс сэргийлж, тийм санаа зорилго байхгүй ч гэсэн Куран Каримыг хувцас, мөнгөн тэмдэгт дээр бичихийг макрух гэж ил тод хэлсэн байдаг.

Камал ибн Хумам: "Куран болон Аллахын нэрийг дирхам, михраб, хана, дэвсгэр дээр бичих нь макрух" [5] гэжээ.

"Әл-фәтәуа әл-һиндия" номонд: "Кураныг ханан дээр бичихийг зарим эрдэмтэд зөвшөөрсөн ч, хана нурвал Кураны айатууд хөл дор орж болзошгүй гэж үзээд макрух гэжээ" [6] гэж бичсэн байна.

Әш-Ширбайни: "Кураныг сүмд ч байсан хамаагүй ханан дээр, мөн хувцас, хоол хүнс зэрэгт бичих нь макрух" [7] гэжээ.

Дээрх эрдэмтдийн Кураныг ханан дээр бичихийг хориглосон нь дорд үзэгдэх эрсдэлтэй холбоотой. Харин доромжлолд хүргэхгүй, ялангуяа ийм үйлдэл нь табаррук буюу ерөөл, эдгэрэлтийн зорилготой бол хориглохгүй.

Гэхдээ Куран айатууд бичсэн аяга таваг, ахуйн эд зүйлс хөл дор орох, гэрийн буланд хаягдах, хүүхдүүд тоглох эрсдэлээс хэн ч баталгаа өгөхгүй. Тиймээс аяга таваг зэрэг ахуйн эд зүйлс дээр Куран айатуудыг бичих нь зөвшөөрөгдөхгүй.

• [1] "Хаж" сүрэг, 32-р айат.

• [2] Куртуби тафсир, 1/29.

• [3] Ибн Батта, "әл-ибәнә", 5/325. Әл-Мустағфири, "Фадайлул Куран", 1/200.

• [4] Абу Убайд Касим ибн Саллам, "Фадайлул Куран", 121.

• [5] Фатху әл-кадир, 1/173.

• [6] Әл-фәтәуа әл-һиндия, 5/323.

• [7] Әл-Иқнағ, 1/254.