«Аятул Курси»-ийн ямар онцлог, ач тус байдаг вэ?

«Аятул Курси» бол Кураны хамгийн дээд, эрхэм айат юм. Абу Хурайрагаас (Аллах түүнд сэтгэл хангалуун байх болтугай) уламжлагдсан хадист Пайгамбар (Аллахын энэрэл, амар амгалан түүнд байх болтугай) ингэж айлдсан байдаг: «Бүх зүйлийн оргил байдаг. Үнэхээр Кураны оргил нь «Бакара» сүрэ. Тэр сүрэнд Кураны хамгийн дээд айат бий. Тэр нь «Аятул-Курси» юм» (Тирмизи). Энэ айатад олон давуу тал бий. «Аятул Курси»-ийн ач тусыг хадисуудаас дурдвал:

1. «Аятул-Курси» уншсан гэрээс шайтаныг үргээнэ. Пайгамбар (Аллахын энэрэл, амар амгалан түүнд байх болтугай) хэлсэн нь: «Бакара» сүрэнд Кураны хамгийн дээд айат бий. Хэн гэртээ уншвал, тэр газраас шайтаныг үргээнэ» (Хаким).

2. Диваажинд ороход болон дараагийн намаз хүртэл Аллахын хамгаалалд байх шалтгаан болдог. Абу Умамагаас (Аллах түүнд сэтгэл хангалуун байх болтугай) уламжлагдсан хадист Аллахын элч (Аллахын энэрэл, амар амгалан түүнд байх болтугай) хэлсэн нь: «Хэн чухал намаз бүрийн дараа «Аятул Курси»-ийг уншвал, түүнийг диваажинтай зөвхөн үхэл л тусгаарлана» гэжээ. Өөр нэг хадист: «Хэн чухал намаз бүрийн дараа «Аятул Курси»-ийг уншвал, дараагийн чухал намаз хүртэл Аллахын хамгаалалд байна» гэжээ.

3. «Аятул-Курси» уншсан хүн янз бүрийн илбэ, хараал, жиннээс хамгаалагдана. Пайгамбар (Аллахын энэрэл, амар амгалан түүнд байх болтугай) хэлсэн нь: «Өглөө «Аятул Курси» уншсан хүн орой болтол, орой уншсан хүн өглөө болтол Аллахын хамгаалалд байна» (Насаи).

4. Унтахын өмнө уншвал өөрийг нь болон хүүхдүүдийг өглөө болтол шайтанаас хамгаална. Аллахын элч (Аллахын энэрэл, амар амгалан түүнд байх болтугай) хэлсэн нь: «Унтахдаа «Аятул Курси» уншсан хүнийг өглөө болтол Аллахын сахиул хамгаална» гэжээ.

5. Амжилт, өгөөж, элбэг дэлбэгийн эх үүсвэр болно. Айша (Аллах түүнд сэтгэл хангалуун байх болтугай) ээжээс уламжлагдсан хадист Пайгамбарт (Аллахын энэрэл, амар амгалан түүнд байх болтугай) нэг хүн гэртээ өгөөжгүй байгаагаа хэлжээ. Тэгэхэд Аллахын элч: «Чи «Аятул Курси» уншдаггүй юм уу? Ямар ч хоолонд «Аятул Курси» уншвал, Аллах түүнд өгөөж, элбэг дэлбэгийг өгнө» гэжээ.

6. Хүнд хэцүү үед Аллахын тусламж ирэхэд хүргэнэ. Пайгамбар (Аллахын энэрэл, амар амгалан түүнд байх болтугай) хэлсэн нь: «Хэн хүнд үед «Аятул Курси» болон «Бакара» сүрийн сүүлийн айатуудыг уншвал, Аллах түүнд тусална» гэжээ. Мөн «Аятул Курси»-г өглөө, оройн зикр, шариатын рукия (уншлага) хийхэд уншдаг.

Дүгнэж хэлэхэд, энэ айатыг цээжилж, тогтмол уншдаг хүн Аллахын хамгаалалд байна. Энэ айат нь янз бүрийн муу зүйл, гай зовлон, аюулаас хамгаалах, амжилт, өгөөжийг нэмэгдүүлэх, шайтаныг үргээх онцгой ач тустай. Мөн уншсанаар их буян хүртэнэ.

Медет КУРМАШУЛЫ,

«Иман» сэтгүүл, №4, 2024 он