АНИМАТОР БОЛОХ ШАРИАТАД ЗӨРЧИЛТЭЙ ЮУ?

Аниматор гэж төрөл бүрийн арга хэмжээнд янз бүрийн дүрд хувирч, зочдыг хөгжөөх уран бүтээлчийг хэлдэг. Сайн аниматор болохын тулд сэтгэлзүйн мэдрэмж, ухаалаг байдал, дотоод соёл хүмүүжил, жүжиглэх ур чадвар, дуулах эсвэл бүжиглэх авьяас, илтгэх урлагийн мэдлэг шаардлагатай гэж мэргэжилтнүүд үздэг.

Аниматор нь зочдыг угтан авч, тэдний сэтгэл санааг өргөх үүрэгтэй. Өнөө үед аниматорын ажил зочид буудал, клуб, хот, баяр ёслол, жуулчдад зориулсан чиглэлээр өргөн дэлгэрчээ. Тэд төрөл бүрийн хамт олны үдэшлэг, тэмцээн, буухиа болон сонирхолтой уралдаан зохион байгуулахад тусалдаг.

Шариатын үүднээс аниматорын ажил хийхэд дараах нөхцөлүүдийг заавал хангах ёстой:

1. Худал хэлэхгүй, хуурахгүй байх. Пайгамбар маань (түүнд Аллахын энэрэл, амар амгалан байг): «Хүмүүсийг инээлгэхийн тулд худал ярьдаг хүнд гай зовлон, гай зовлон, гай зовлон болог!» – гэжээ (Ахмад). Ибн Масъуд (Аллах түүнд сэтгэл хангалуун байг): «Үнэнээр ч, тоглоомоор ч худал хэлж болохгүй. Хүүхдүүддээ ямар нэг зүйл амлаад, биелүүлэхгүй орхиж болохгүй» – гэжээ.

2. Шалтгаангүйгээр хүнийг буруутгах, доромжлохгүй байх. Аллах Таала: «Танай дундаас нэг бүлэг өөр нэг бүлгийг дооглож болохгүй», «Бие биенээ доромжлохгүй, нэр хочоор дуудалцаж болохгүй» , – гэжээ («Хужурат» сүрэг, 11-р аят).

3. Амьтны үйл хөдлөлийг дуурайх, дууг нь гаргахаас зайлсхийх. Жишээ нь, нохой шиг хуцах, илжиг шиг орилох гэх мэт. Учир нь Аллах Таала муу хүнийг нохой, илжигтэй зүйрлэж, тэдний дорд байдлыг харуулсан. Коранд: «Тэр (ертөнцөд) зууралдаж, хүсэлдээ автсан. Түүний жишээ бол яг нохой» («Ағраф» сүрэг, 176-р аят), «Тауратын номыг үүрсэн хэрнээ түүнийг хэрэгжүүлээгүй хүмүүсийн жишээ бол ном үүрсэн илжигтэй адил» («Жума» сүрэг, 5-р аят) гэжээ.

4. Шашныг муу харагдуулахгүй байх. Ямар ч нөхцөлд мусульман хүн өөрийн шашин, Пайгамбар, ном, шашны эрдэмтдээ хамгаалах ёстой. Аллах Таала: «Хэрвээ тэднээс яагаад муу хэлж, дооглосныг нь асуувал, тэд: “Бид зүгээр л ярьж, тоглож байсан юм” гэж хэлнэ. (Тэдэнд): “Та нар Аллах, Түүний аят, Пайгамбарыг дооглож байна уу?!” – гэж хэл. (Хоёр нүүртнүүд ээ!) Өөрийгөө зөвтгөх гэж оролдолгүй. Үнэндээ, та нар итгэлээ гэж хэлсэн ч, дотроо нуусан үл итгэлээ илчилсэн» , – гэжээ («Тәубе» сүрэг, 65-66-р аят).

Үүнд малгай, сахал, ороолт болон бусад мусульман шинж тэмдэг, суннат үйлдлийг багтааж болно.

5. Эрэгтэй хүн эмэгтэйд, эмэгтэй хүн эрэгтэйд болон шашингүй хүнд дуурайхгүй байх. Пайгамбар маань (түүнд Аллахын энэрэл, амар амгалан байг): «Хэн нэгэн бүлэгт өөрийгөө адилтгавал, тэр тэдний нэг болно» , – гэжээ (Абу Дауд). Мөн Пайгамбар маань (түүнд Аллахын энэрэл, амар амгалан байг) өөрийгөө эмэгтэйчүүдэд дуурайсан эрчүүд, өөрийгөө эрчүүдэд дуурайсан эмэгтэйчүүдийг хараасан (Бухари).

6. Ёс бус үйлдэл гаргахгүй, бүдүүлэг үг хэлэхгүй байх. Пайгамбар маань (түүнд Аллахын энэрэл, амар амгалан байг): «Аллах ёс бус явдал (ёс бус үйлдэл, бүдүүлэг үг) -ыг жигшдэг» , – гэжээ (Ахмад).

Бэлтгэсэн: Хасан АМАНКУЛ