БАРЗАХЫН ОРЧИН ГЭЖ ЮУ ВЭ?

Оршуулгын орчин бол ахирын аяллын анхны зогсоол юм. Үүнийг барзахын орчин гэж нэрлэдэг. Энэ нь нас барсан хүмүүс ахирын өдөр эхлэх хүртэл байх газар юм. Өөрөөр хэлбэл, энэ дэлхий ба амилалтын өдөр хоёрын хоорондох зааг тул барзахын орчин гэж нэрлэдэг.

Аллах Таала Кураанд: «Тэдний нэгэнд үхэл ирэхэд: “Эзэн минь, намайг (дэлхийд) буцаагаач! Магадгүй би орхисон (дэлхийд) сайн үйл хийх бол уу” гэдэг. Үгүй, энэ бол түүний хэлсэн хоосон үг. Тэдний ард дахин амилуулах өдөр хүртэл саад (барзах) бий» гэжээ («Муминун» сүрэг, 99-100 дугаар аят).

Ахли суннагийн итгэлээр, хүн нас барсны дараа оршуулгад орсон эсэхээс үл хамааран, усанд живсэн, шатсан, амьтан шувуу идсэн ч бай, өөрийнхөө үйлдэлд тохирсон байдлаар шалгуулж, асуултад орно. Аллахын элч (түүнд Аллахын амар амгалан, ерөөл нь байх болтугай) оршуулгын дэргэд:

«Ах дүүсийнхээ төлөө Аллахаас уучлал гуйж, түүний төлөө аврал хүс. Учир нь тэр одоо шалгагдаж байна» гэжээ.

Мөн хадист дурдсанаар, хүн оршуулгад орсны дараа Мункар, Накир гэх хоёр тэнгэрэлч ирж асуулт тавина. Хэрэв итгэлтэй хүн бол тэнгэрэлч нар «Танай Эзэн хэн бэ?» гэхэд «Миний Эзэн – Аллах», «Шашин чинь юу вэ?» гэхэд «Миний шашин – Ислам», «Танайд илгээгдсэн хүн хэн бэ?» гэхэд «Тэр бол Аллахын элч» гэж хариулна. Тэгэхэд тэнгэрээс нэг зарлагч: «Миний боол үнэн хэлсэн тул түүнд (оршуулгад нь) диваажингаас (дэвсгэр) дэвс, түүнийг диваажингаас хувцасла, мөн диваажин руу нь хаалга нээ!» гэж хэлнэ. Түүнд (диваажингийн) үнэр, салхи ирж, оршуулгын өргөн нь нүд хүрэх газарт хүртэл тэлэгдэнэ» гэжээ.

Харин хэрвээ хоёр нүүрт (мунафик) хүн бол тэнгэрэлч нар асуухад: «Мэдэхгүй, хүмүүсийн хэлдгийг сонсоод л давтаж явсан. Тэр хүнийг хэн гэдгийг мэдэхгүй» гэж хариулна. Тэгэхэд хоёр тэнгэрэлч: «Чи ингэж хэлэхийг чинь мэдэж байсан» гэнэ. Дараа нь газарт: «Түүнд ойрт» гэж тушаана. Газар ойртож, түүнийг хавирга нь нийлтэл шахна. Ингээд Аллах Таала түүнийг дахин амилуулах хүртэл, өөрөөр хэлбэл амилалтын өдөр хүртэл тэр газартаа тарчилж хэвтэнэ. Өөрөөр хэлбэл, нас барсан хүн итгэлгүй буюу хоёр нүүрт бол хоёр тэнгэрэлчийн асуултад хариулж чадахгүй, тамын хаалга нээгдэж, тэндхийн зовлонгийн шинж тэмдгүүдийг үзүүлнэ.

Дүгнэж хэлбэл, хадист өгүүлснээр оршуулга нь диваажингийн цэцэрлэгүүдийн нэг цэцэрлэг эсвэл тамын нүхнүүдийн нэг нүх юм. Тиймээс хүн итгэлгүй бол оршуулгандаа тарчилна, итгэлтэй бол нигүүлсэлд умбана. Энэ хугацаа хүн нас барсан цагаас эхэлж, амилалтын өдөр хүртэл үргэлжилнэ. Аллах Таала бид бүгдийг оршуулгын зовлон, тамын галын шийтгэлээс хамгаалж, диваажингийн эзэд болгохыг хүсэж байна!

Медет КУРМАШУЛЫ

«Иман» сэтгүүл, №8, 2024 он