Брекет тавих боломжтой юу?

Ер нь хүн бүр өөрийнхөөрөө үзэсгэлэнтэй, өвөрмөц гоо сайхантайгаар бүтээгдсэн. Аллах Таала Куран-д:

«Яахын ч эргэлзээгүй, Бид хүн төрөлхтнийг хамгийн сайхан, хамгийн төгс дүр төрхөөр бүтээсэн» гэжээ («Тин» сүрэг, 4-р аят).

Тиймээс хүн бүр бусад эрхтэн шигээ шүд нь ч бас үзэсгэлэнтэй, шулуун байхыг хүсдэг. Орчин үед шүдийг засах орчин үеийн ортодонтын технологиуд бий болсон. Үүнд авагддаг болон тогтмол хиймэл шүд, шүдний хавтан, мөн брекет орно. Мөн брекет нь шүдний өвчний эрсдэлийг бууруулж, буйлыг хамгаалж, үг яриа тод дугарахад тусалж, нүүрний хэлбэрийг сайжруулж, амьсгалыг ч сайжруулдаг.

Хадисуудад Пайгамбар маань (түүнд Аллахын салават ба амар амгалан байх болтугай) шүдээ онцгой арчилдаг байсан тухай өгүүлсэн. Нэг удаа тэрээр:

«Хэрвээ миний үмметэд хүндрэл учрахгүй байсан бол, би тэдэнд намаз бүрийн өмнө шүдээ цэвэрлэхийг тушаах байсан»

гэжээ (Бухари ба Муслим). Аллахын элч (түүнд Аллахын салават ба амар амгалан байх болтугай) гэрээсээ гарахдаа, гэртээ ирэхдээ, намазын өмнө шүдээ цэвэрлэдэг байсан бөгөөд шөнө тахажуд намазын өмнө ч шүдээ цэвэрлэхийг зөвлөсөн. Учир нь тэнгэрийн сахиулууд сайхан үнэрт дуртай байдаг аж.

Брекет нь эрүүл мэндэд ч чухал нөлөөтэй. Учир нь энэ нь инээмсэглэлийг сайхан болгож, нас ахихад шүдийг бүрэн хадгалахад тусалдаг.

Мэргэжилтнүүдийн хэлснээр, шүдний хэмжээ, зуулт, байрлал болон амны хөндийн бусад үзүүлэлтүүд нь буйл, бүр ходоод, гэдэсний эрүүл мэндэд ч нөлөөлдөг. Гэсэн ч эрүүл шүд бол Аллахын агуу бэлэг гэдэг нь тодорхой.

Эмчлүүлэх, гологдлоо нуух, эсвэл гоо сайхны үүднээс шүдэндээ брекет тавиулж, муруй шүдийг засахыг шариат зөвшөөрдөг. Учир нь Аллахын элч (түүнд Аллахын салават ба амар амгалан байх болтугай):

«Аллахын боолууд аа, эмчлүүл! Учир нь Аллах өвчнийг ч, эмийг ч бүтээсэн»

гэжээ (Тирмизи, Ибн Мажа).

Брекет тавиулж, муруй шүдийг засах, сэргээх нь Аллахын бүтээсэн төрхийг өөрчилж байгаа хэрэг биш. Брекет тавиулсан хүн нүгэл хүлээхгүй. Мөн брекет тавих нь тахарат болон гусалд саад болохгүй.