Эмэгтэйчүүд сүмд хамт олноороо намаз унших нь зөв үү?

Ерөнхийдөө эмэгтэйчүүд сүмд очиж хамт олноороо намаз уншихад хориглох зүйл байхгүй. Гэхдээ гэртээ намаз унших нь илүү зохистой [1] .

Аллахын Элч (түүнд Аллахын энх амгалан, ерөөл нь байх болтугай):

لَا تَمْنَعُوا نِسَاءَكُمْ الْمَسَاجِدَ وَ بُيُوتُهُنَّ خَيْرٌ لَهُنَّ

"Эмэгтэйчүүдээ сүмд очихыг нь бүү хоригло. Гэхдээ гэр нь тэдэнд сүмд очихоос илүү сайн" [2] гэж хэлсэн байна.

Ханафи мазхабын эрдэмтэд эмэгтэйчүүдэд фитна (ёс бус явдал)-д өртөх эрсдэлтэй тул залуу эмэгтэйчүүдийн сүмд очиж хамт олноороо намаз уншихыг макрух гэж үзсэн. Учир нь Аллахын Элч (түүнд Аллахын энх амгалан, ерөөл нь байх болтугай): "Гэр нь тэдэнд сүмд очихоос илүү сайн" гэж хэлсэн. Харин нас өндөртэй эмэгтэйчүүд өглөөний болон нар жаргах, шөнийн намазуудад сүмд очиж болно. Энэ нь имам Абу Ханифагийн байр суурь юм. Учир нь ёс бус санаатай хүмүүс үд дунд болон үдээс хойших намазын үед ихэвчлэн байдаг бол, нар жаргах үед оройн хоолоо идэж завгүй, өглөө болон шөнийн намазын үед унтаж байдаг гэжээ. Абу Юсуф болон Мухаммад-ын үзлээр бол ахмад эмэгтэйчүүд бүх фарз намазын үед сүмд очиж болно [3] .

Гэхдээ хэрвээ сүмд эмэгтэйчүүдэд зориулсан тусдаа хэсэг байх ба тэр хэсэг рүү орох зам нь олон нийтэд ил харагдахгүй бол очиход асуудалгүй. Гол зорилго нь эмэгтэйчүүдийн нэр төрийг хамгаалах, нийгэмд эмх замбараагүй байдал үүсэхээс сэргийлэх явдал юм.

Монголын Исламын Шашны Ерөнхий Газрын Шариатын болон фатвагийн хэлтэс

• [1] "әл-Һидәя", 2/354. "Бәдәиу әс-сәнәйығ", 1/275.

• [2] Абу Дауд, №5468.

• [3] Мавсули, "әл-Ихтияр", 1/204-207. Бурхануддин, "әл-Мухит", 2/208-209. Маргинаани, "әл-һидәя", 1/57. Ибн Абидин, "Радду әл-мухтар", 2/307.