Хажчды угтах нь шариатынхаа эсрэг үү?

«Хаж» гэдэг нь үгийн утгаараа – ариун газруудыг зорихыг хэлнэ. Харин шариатын хувьд «Арафат уулан дээр тодорхой хугацаанд ибадат хийхээр зогсох, дараа нь шаардлагатай тауафыг хийж Каабад зочлох, бусад үйлдлийг гүйцэтгэх» гэсэн утгатай.

Өөр нэг тайлбарт хаж гэдэг нь «ариун Каабаг тодорхой өдрүүдэд, тодорхой нөхцөлтэйгөөр зорих» гэжээ.

Хажийн ёслол дууссаны дараа хажчид эх орондоо буцаж ирдэг. Аллах Таала хажийн үед тэдэнд Өөрийн сүр хүч, агууг харуулж, тоолж баршгүй буян хайрладаг.

Хаж хийсэн хүмүүсийн тухай эрхэм элч (Аллах түүнд энх амгалан, ерөөл буулгаг) ингэж айлдсан:

«Хаж ба умра хийсэн хүмүүс бол Аллахын зочид. Аллах тэднийг урьсан, тэд ч Түүний урилгыг хүлээн авсан. Тэд Аллахаас хүссэнээ гуйж байна, Аллах ч тэдний хүсэлтийг биелүүлнэ» [1].

Хажчдын зорилго бол Аллах Таалын таалал, нүглээсээ уучлал эрэх явдал юм. Үүнээс өөр зорилго байх ёсгүй. Аллахын элчийн (Аллах түүнд энх амгалан, ерөөл буулгаг) намтарт эх орондоо буцаж ирэхэд нь хажчдад онцгой хүндэтгэл үзүүлдэг байсныг олонтаа бичсэн байдаг.

Мусульман хүн хажчидтай уулзахдаа Пайгамбарын (Аллах түүнд энх амгалан, ерөөл буулгаг) хадист дурдагдсан үгийг хэлэх ёстой:

عَنْ عَائِشَةَ رَضِيَ اللهُ عَنْهَا أَنَّ رَسُولَ اللهِ صَلّى اللهُ عَلَيْهِ وَسَلَّمَ قَالَ لَهَا فِي عُمْرَتِهَا:

(( إِنَّ لَكِ مِنَ الأَجْرِ عَلَى قَدْرِ نَصَبِكِ وَنَفَقَتِكِ )).

Пайгамбар (Аллах түүнд энх амгалан, ерөөл буулгаг) Айша эхэд: «Чиний (умрагийн) шагнал чамайг хэр их ядарч, хөрөнгө зарцуулснаас хамаарна» [2], — гэжээ.

Өөр нэг хадист: Имам Бухари (Аллах түүнийг өршөөг) өөрийн сахих хадисын эмхэтгэлд «Аяллаас ирсэн хажчдыг угтах» гэсэн тусгай бүлэг гаргаж, Ибн Аббасаас (Аллах түүнд сэтгэл хангалуун байг) ирсэн хадисыг дурдсан:

«Пайгамбар (Аллах түүнд энх амгалан, ерөөл буулгаг) Меккад ирэхэд Абдмуталиб овгийн хүүхдүүд түүнийг угтдаг байв. Дараа нь нэг хүүхдийг урдаа, нөгөөг нь ардаа суулгадаг байжээ» [3].

Тэгэхээр мусульман хүн эрхэм элчийн (Аллах түүнд энх амгалан, ерөөл буулгаг) суннатыг чанд баримталж, Аллахын өргөмжилсөн зүйлд хүндэтгэл үзүүлэх ёстой. Хажчдыг болон хажийн ёслолыг хүндэтгэх нь Аллах Таалын зөвшөөрсөн, хайртай үйлсийн нэг юм.

Хажчид амар мэнд эх орондоо ирэхэд тэднийг угтах, эсвэл гэрийг нь чимэглэх зэрэг нь шариатад харш зүйл биш. Энэ бол зүгээр л тэдэнд хүндэтгэл үзүүлж буй хэрэг гэж үзэх нь зүйтэй.

Ислам МАРАТУЛЫ,

Казахстаны Мүфтиятын шашны сэргээн засах хэлтсийн мэргэжилтэн

• [1] (Насаи, Ибн Мажа)

• [2] (Хаким, Мустадрак)

• [3] (Бухари)