Хэд хэдэн хүн уншсан Куран хатимд тооцогдох уу?

Үнэндээ Куран унших нь их буянтай шүтлэг бөгөөд зикрийн хамгийн сайнаас нь юм. Учир нь Куран уншихад хүний иман улам батжин, түүний шагналыг зөвхөн Аллах Таала л мэднэ.

Абдулла ибн Масъуд (Аллах түүнд сэтгэл хангалуун байх болтугай)-аас уламжлагдсан хадист Аллахын элч (Аллахын энх амгалан, ерөөл түүнд байх болтугай): «Хэн Аллахын номоос нэг үсэг уншвал түүнд нэг буян бичигдэнэ. Нэг буян нь арван буянтай тэнцэнэ. Би "Алиф, лам, мим"-ийг нэг үсэг гэж хэлэхгүй. Алиф – нэг үсэг, лам – нэг үсэг, мим – нэг үсэг» гэжээ (Тирмизи).

Фаруа ибн Науфал ал-Ашжағи (Аллах түүнд сэтгэл хангалуун байх болтугай) хэлсэн нь: «Би Хаббаб ибн Аратын хөрш байлаа. Нэг удаа сүмээс гарахад тэр миний гарыг атгаад: "Аллахын боол минь! Аль болох Аллахад ойр бай! Чи Түүнд үгээр (Куран) илүү ойртох зүйл үгүй" гэж хэлсэн» (Хаким).

Куран унших нь тасбих, тахмид, тахлил, такбир уншихаас илүү сайн. Куран уншихын давуу тал нь Рамадан сард улам тод илэрдэг. Учир нь Куран энэ сард буусан. Гэвч хэд хэдэн хүн нэг эсвэл хоёр парагаар хувааж авч, Кураныг бүтнээр нь уншвал, шагнал нь бүгдэд нь тэнцүү бичигдэх үү? Өөрөөр хэлбэл, тэд бүгд Кураныг бүтнээр нь уншсан гэж тооцогдох уу, эсвэл хүн бүр өөрийн уншсан хэсгийнхээ хэмжээгээр шагнал авах уу?

Ер нь Кураныг хүн бүр тус тусдаа уншдаг эсвэл нэг нь уншаад бусад нь сонсдог. Абу Хурайра (Аллах түүнд сэтгэл хангалуун байх болтугай)-аас уламжлагдсан хадист Аллахын элч (Аллахын энх амгалан, ерөөл түүнд байх болтугай):

«Аллахын ордны нэгэнд цугларч, Аллахын номыг уншиж, бие биедээ заадаг бүлэг хүмүүст амар амгалан ирж, өршөөл бууж, тэднийг тэнгэрийн элч нар хүрээлж, Аллах тэднийг Өөрийнх нь дэргэдэх хүмүүсийн дунд дурдана» гэжээ (Муслим).

Куран уншихаар цуглах, нэгдэх нь сайн (буянтай) үйл. Куран уншигчид ч, сонсогчид ч шагнал авна. Хүндэт Элч (Аллахын энх амгалан, ерөөл түүнд байх болтугай) уншдаг ч, сонсдог ч байсан. Аллах Таала:

«Кураныг уянгалаг (тодорхой) унш» («Муззаммил» сүрэг, 4-р аят), «Түүнд (Кураны) аятууд уншигдах үед тэдний иман батжин, Эзэндээ бүрэн найдна» («Анфал» сүрэг, 2-р аят) гэжээ.

Тиймээс хэд хэдэн хүн нийлж Кураныг бүтнээр нь унших нь буянтай, сайн заншил. Энэ нь хатимд тооцогдоно. Гэхдээ хүн бүр өөрийн уншсан хэсгийнхээ шагналыг авна. Учир нь 30 хүн нэг өдөр мацаг баривал бүгдэд нь 30 өдрийн мацагийн шагнал бичигдэхгүй. Мөн 20 хүн хоёр ракаат намаз уншвал, бүгд 20 ракаат намаз уншсан гэж тооцогдохгүй. Тиймээс Кураныг хатим болгоод, шагналыг нь авахыг хүссэн хүн өөрөө бүтнээр нь унших ёстой. Мөн нэг хүн эсвэл хэд хэдэн хүн Кураныг бүтнээр нь уншаад, шагналыг нь нас барсан хүнд зориулах боломжтой.

Хасан АМАНКУЛ

«Мунара» сонин, №8, 2021 он