Хийсэн буян эсвэл уншсан Кур'аны шагналыг нас барсан хүнд зориулж болох уу?

Хийсэн ибадат болон буянт үйлсийн шагналыг өөр хүнд зориулж өгөх нь зөвшөөрөгдсөн. Хүн өөрийн уншсан Кур'ан-и Кэрим, хийсэн хатм эсвэл үйлдсэн буянгийн шагналыг өөр хүнд зориулах боломжтой. Зориулж буй хүн нь амьд ч бай, нас барсан ч бай, түүнд энэ шагнал хүрнэ гэж найдаж болно. Учир нь Пайгамбар (с.а.с.) нас барсан хүнд Фатиха сүрийг уншиж, үүнийг зөвлөсөн тухай (Ибн Мажа, Жаназ, 22 [1495, 1496]), мөн Абдуллах бин Өмөр (р.а.) нас барсан хүний сүнсэнд Бакар сүрээс уншихыг сайшаасан тухай дамжуулагдсан байдаг. (Бейхаки, эс-Сүнәнүл-күбра, 4/93 [7068]) Өөр хүнээс зориулагдсан шагналаар тухайн хүний өөрөө хийх ёстой ибадатын өр төлөгдөхгүй ч, энэ нь түүний буян, шагналыг ихэсгэж, дээд зэргийг нь нэмэгдүүлэхэд тусалж болох юм.

Бени Селеме овгийн нэг хүн эцэг эх нь нас барсны дараа тэдэнд сайн үйл хийж болох эсэхийг асуухад, Пайгамбар (с.а.с.) “Тийм ээ, тэдэнд өршөөл гуйх, тэдний төлөө уучлал хүсэх, тэдний гэрээслэлийг биелүүлэх, төрөл садантайгаа холбоотой байж, үүргээ биелүүлэх, найз нөхдөд нь хүндэтгэл үзүүлж, хишиг хүртээх” (Абу Давуд, Адаг, 128 [5142]; Ибн Мажа, Адаг, 2 [3664]) гэж хариулсан байна.

Ээж нь гэнэт нас барсан бөгөөд хэрвээ ярьж чадсан бол садака өгөхийг гэрээслэх байсан гэж бодож, түүний нэрийн өмнөөс садака өгвөл шагнал нь түүнд хүрэх эсэхийг асуусан сахабад; “Тийм ээ, хүрнэ. Түүний нэрийн өмнөөс садака өг.” (Бухари, Васая, 19 [2760]; Муслим, Закят, 51 [1004]) гэж айлдсан байна.

Эх сурвалж: T.C. Diyanet İşleri Başkanlığı, Din İşleri Yüksek Kurulu