Хүн намаз (залбирлын) уншдаггүй бол мацаг барьсан нь хүлээн зөвшөөрөгдөх үү?

Ибн Омар (Аллах түүнд сэтгэл хангалуун байх болтугай) дамжуулсан нэгэн хадист Аллахын Элч (түүнд Аллахын энх амгалан, ерөөл нь байх болтугай) ингэж айлджээ: “Ислам таван зүйл дээр тогтсон. Тэдгээр нь – «Лә иләһа илләллаһу уә әннә Мухаммадән расулуллаһи» гэж хэлэх, намазыг бүрэн гүйцэтгэх, закат өгөх, Хажийн мөргөлд явах, Рамадан сард мацаг барих” гэжээ (Бухари, Муслим).

Исламд заасан бүх фарзыг биелүүлэх нь үүрэг юм. Гэвч мусульман хүний бүх ибадат хүлээн зөвшөөрөгдөх эсэх нь түүний жинхэнэ итгэл (иман)-тэй холбоотой. Өөрөөр хэлбэл, Мухаммад (түүнд Аллахын энх амгалан, ерөөл нь байх болтугай) пайгамбарын Аллах Таалaгаас дамжуулсан бүхнийг чин сэтгэлээсээ хүлээн зөвшөөрч, намаз уншиж, мацаг барьж, закат өгч, хаж хийж, бусад сайн үйлсийг хийвэл, түүний дуа, хүсэл нь хүлээн зөвшөөрөгдөж, түүнд шагнал ирнэ. Тиймээс бүх сайн үйлийн хүлээн зөвшөөрөгдөх эсэх нь юуны өмнө бидний иманд хамаатай.

Аллах Таала ямар ч үйлийг шагналгүй эсвэл шийтгэлгүй орхихгүй. Энэ тухай Коранд:

“Тиймээс хэн өчүүхэн ч гэсэн сайн үйл хийвэл, тэрнийхээ шагналыг авна. Хэн өчүүхэн ч гэсэн муу үйл хийвэл, тэрнийхээ шийтгэлийг амсана” гэжээ ("Залзала" сүрэ, 7-8 дугаар аят).

Аллах Таала намаз уншаагүй хүний мацгийг үл тоохгүй, түүнд зохих шагнал, буянг нь өгнө. Бүтээгч Эзэн маань Өөрийн шударга ёсны талаар ариун Коранд ингэж айлджээ:

“Бид тэр өдөрт тохирсон яг таг жинлүүрүүдийг босгоно. Хүмүүсийн үйлсийг бүрэн дүүрэн хэмжинэ. Тэр өдөр хэнд ч өчүүхэн ч гэсэн шударга бус явдал тохиолдохгүй. Хийсэн үйл чинь гичийн үрийн хэмжээтэй ч байсан бид түүнийг жинлэнэ. Бид бол тооцоо бодогчдын хувьд хангалттай” ("Анбия" сүрэ, 47 дугаар аят).

Өдөрт таван удаа намаз унших ба Рамадан сард мацаг барих нь Исламд заасан тус тусдаа ибадатууд юм. Намаз уншдаггүй хүн ч мацаг барьж болно. Гэхдээ намазын үнэ цэнэ өндөр бөгөөд үүнийг орхих нь том нүгэл гэдгийг мартаж болохгүй. Намаз бол насанд хүрсэн, ухаантай хүн бүрт фарз. Намаз бол өдөрт таван удаа үйлдэх ибадат. Мөн сүүлчийн өдөр хамгийн түрүүнд асуух үйл бол намаз юм.

Пайгамбар маань (түүнд Аллахын энх амгалан, ерөөл нь байх болтугай): “Сүүлчийн өдөр хамгийн түрүүнд хүнээс намазын талаар асууна. Хэрэв намаз нь зөв бол аврагдаж, амжилт олно. Хэрэв намазгүй бол хохирч, алдана” гэжээ (Тирмизи, Абу Дауд, Насаи).

Бэлтгэсэн: Хасан АМАНКУЛ