ЙОГАТАЙ ХИЧЭЭЛЛЭХ ЗӨВ ҮҮ?

Йога гэдэг нь сэтгэл зүй, оюун санаа, бие махбодийн дасгалуудыг багтаасан, эртний Энэтхэгт үүссэн ойлголт юм. Йогийн зорилго нь бие, сэтгэлийн зохицлыг бий болгох бөгөөд биеэ чийрэгжүүлэх замаар сэтгэл санааны эрүүл мэнд, сэргэг байдлыг хөгжүүлэхэд чиглэдэг.

Медитацийг энэ тохиолдолд аз жаргалд хүрэх цорын ганц зам мэтээр санал болгодог. Йога болон медитаци нь индуизм ба буддизмын салшгүй хэсэг бөгөөд тэдгээрийн бүх элемент нь дахин төрөлтөд итгэх үзэлд суурилсан байдаг. Энэ үзэл баримтлал нь исламын ойлголтод харш. Йогатай хичээллэх нь зохисгүй болохыг «Әл-йуға фи мизан әл-нақд әл-ғилми» номонд дараах хэд хэдэн шалтгаанаар тайлбарласан байна.

• Шашны итгэл үнэмшилд харш. Учир нь йогад Аллах Таалад хамсаар тавих, нарны өмнө мөргөж, түүний нэрийг давтан хэлэх зэрэг багтдаг.

  «(Мухаммад аа!) Би зөвхөн нэг Аллахад л мөргөж, Түүнд юу ч хамсаар тавихгүй байхыг тушаагдсан. Би зөвхөн Түүнд дууддаг бөгөөд Түүнд эргэн очно» гэж хэл» , – гэжээ («Рағыд» сүрэс, 36-аят).

  Өөр нэг аятад: «Ямар ч эргэлзээгүй, чамд ч, чамаас өмнө ирсэн элч нарт ч: “Хэрэв Аллахад өөр зүйлийг хамсаар тавивал хийсэн бүх (сайн) үйл чинь талаар болно. Ингээд чи гарцаагүй хохирогчдын нэг болно” гэж илгээсэн» гэжээ («Зүмәр» сүрэс, 65-аят).

• Шүтээн шүтэгчдийг дуурайх.

  Элч (Түүнд Аллахын энэрэл, амар амгалан байг): «Хэн нэгэн ард түмнийг дуурайвал, тэр тэдний нэг мөн» гэжээ (Ахмад, Әбу Дәуіт, Табарани).

• Зарим дасгалууд, тухайлбал хэвийн бус, зохисгүй суух, удаан хугацаагаар нарны өмнө зогсох, нүд салгалгүй нар руу харах зэрэг нь хүний эрүүл мэнд, сэтгэл зүйд сөрөг нөлөөтэй.

  Элч (Түүнд Аллахын энэрэл, амар амгалан байг): «Өөртөө болон бусдад хор учруулахыг хориглоно» гэжээ (Ахмад, Ибн Мәжа).

• Цагийг дэмий үрнэ. Мөн энэ дэлхийд гарз, хор хохирол авчирч, нөгөө ертөнцөд гамшиг, найдваргүй байдалд хүргэнэ.

  Элч (Түүнд Аллахын энэрэл, амар амгалан байг): «Хүн амьдрал, түүнийг хэрхэн өнгөрүүлсэн, мэдлэг, түүнийг хэрхэн ашигласан, эд хөрөнгө, түүнийг хаанаас олж, хэрхэн зарцуулсан, бие махбодь, түүнд хэрхэн анхаарал тавьсан тухай дөрвөн зүйлийг асуулгүйгээр байрнаасаа хөдөлж чадахгүй» гэжээ (Тирмизи).

Харин шашны хориглосон үйлдэл хийхгүйгээр зөвхөн спортын зорилгоор йогатай хичээллэхийг шариат зөвшөөрдөг. Гэвч йогийн тусламжтайгаар бие, оюун ухаанаа эрүүл байлгахыг зорьж буй мусульман хүн исламын мөргөлүүд илүү давуу болохыг санах хэрэгтэй. Учир нь намаз, зикр, мацаг зэрэг мөргөлүүд бие махбодид эрүүл мэнд, зүрхэнд амар амгалан авчирдаг нь тодорхой.

Коранд: «Зүрх сэтгэл зөвхөн Аллахыг дурсах замаар л тайвширч, бүрэн ханамжид хүрнэ» гэжээ («Рағыд» сүрэс, 28-аят).

Бэлтгэсэн Хасан АМАНКУЛ

«Мунара» сонин, №10 , 2021 он