Жума өдрийн мэнд хүргэх нь бидъат уу?

Мусульманчууд нэг нэгэндээ энх амгалан, сайн сайхныг хүсэж, жума өдрөөр мэндчилэх нь мубах буюу зөвшөөрөгдсөн үйлдэл юм. Үүнд тусгайлан буян ч, нүгэл ч бичигдэхгүй. Учир нь жума өдрийн мэндчилгээ нь шариатын ерөнхий зорилгод нийцдэг.

Аллах Таала Куранд: «Хүмүүст сайхан үг хэл» гэж тушаасан («Бақара» сүрэг, 83-аят).

Мөн Пайгамбар (түүнд Аллахын энх амгалан, ерөөл нь оршиг) хэлсэн нь: «Сайн үг бол садака» (Бухари, Муслим).

Жума өдрөөр мэндчилэх нь мусульманчуудын дунд олон зууны турш уламжлагдсан заншил юм. Өмнө нь ч тэд энэ өдөр баяр баяслаа хуваалцаж, нэгэндээ сайн сайхныг хүсэж, залбирч ирсэн. Абдулла ибн Масъуд (Аллах түүнд сэтгэл хангалуун байг): «Мусульманчууд сайн гэж үзсэн зүйл Аллахын өмнө ч сайн» гэжээ (Ахмад).

Мөн хүн төрөлхтний түүхэн дэх хамгийн чухал үйл явдлууд жума өдөр болсон байдаг. Энэ талаар Пайгамбар (түүнд Аллахын энх амгалан, ерөөл нь оршиг):

«Жума бол нар мандсан өдрүүдийн хамгийн сайхан нь. Адам (түүнд Аллахын энх амгалан оршиг) жума өдөр бүтээгдсэн, жума өдөр диваажинд орсон, жума өдөр диваажингаас гарсан. Мөн сүүлчийн өдөр ч жума өдөр тохионо» гэжээ (Муслим).

Түүнчлэн жума өдөр хийсэн ибадат нь бусад өдрүүдээс илүү их буянтай. Тиймээс сэтгэлдээ иман тээсэн мусульман хүн жума өдрийн үнэ цэнийг сайн мэддэг бөгөөд энэ өдрийг Бүтээгчийн таалалд нийцүүлэн онцгойлон өнгөрүүлэхийг хичээдэг.

Хазрат Омар (Аллах түүнд сэтгэл хангалуун байг): «Бүх магтаал Аллахад! (Бүтээгч маань) жума болон арафа өдрийг бид мусульманчуудад баяр болгон өгсөн» гэжээ (Табари).

Иймд баярын өдрүүдэд мэндчилгээ зөвшөөрөгддөг шиг жума өдөр ч сайн сайхныг хүсэж, мэндчилэх нь зохистой. Учир нь дээрх хадис жума өдөр ч баяр болохыг баталж байна. Энэ өдрийг баяр баясгалантай, сайхан үнэртэн хэрэглэж, ибадатаа хийж, бие биенээ асууж, сайн сайхныг хүсэж өнгөрүүлэх нь шариатад харш биш. Жума өдрүүдэд «өдөр тань өгөөмөр байг», «жума мубарак болог» гэх мэт үгс хэлэх нь ч сайн үгсийн тоонд орно. Гэхдээ мэндчилгээ, сайн үг хэлэх нь хүний өөрийн сонголт бөгөөд үүнийг уажиб буюу сунна гэж хэлэхгүй. Энэ үйлдлийг хийгээгүй хүнийг нүгэлтэн гэж үзэхгүй.

Бэлтгэсэн: Хасан АМАНҚҰЛ