Каабын дотор юу байдаг вэ?

Кааба бол хүн төрөлхтөнд Аллахд мөргөхөд зориулан баригдсан хамгийн анхны сүм бөгөөд бүх мусульманчуудын кибла юм. Энэ нь ариун Мекка хотод байрладаг. Кааба нь шоо хэлбэртэй барилга бөгөөд арабууд ийм хэлбэрийн байшинг "Кааба" гэж нэрлэдэг.

Өндөр нь 15 метр, талбай нь 180 м.кв. Дөрвөн булантай: Хар чулуу байрлах булан, Ирак, Шам болон Йемен булан. Каабын дотор юу байдгийг олон хүн мэддэггүй. Зуу гаруй жилийн өмнө энэ асуулт тавигддаггүй байв. Учир нь хэн ч Каабад орж болдог байсан. Гэвч мөргөлчдийн тоо нэмэгдсэн болон бусад шалтгааны улмаас түүний хаалгыг зөвхөн цэвэрлэгээ хийх зорилгоор жилд хоёр удаа нээдэг болсон. 2016 онд Саудын Арабын улс түүнийг зөвхөн Мухаррам сард нэг удаа угаадаг гэж зарласан. Мөн Саудын Арабын Хаант Улсын зөвшөөрлөөр өндөр албан тушаалтнууд болон тусгай зочдод зориулан нээдэг.

Юуны өмнө Каабын хаалганаас эхэлье. Каабын хаалга Хар чулуу байрлах буланд ойрхон, газрын гадаргаас 2 метр орчим өндөрт байрладаг тул шат ашиглан өгсдөг. Хаалган дээр хийсэн дархны гарын үсэг бий. Хаалгыг чимэглэхэд 280 кг алт ашигласан. Дэлхийн хамгийн үнэтэй хаалга бол Каабын хаалга юм. Каабын түлхүүр Пайгамбарын маань (түүнд Аллахын энэрэл, амар амгалан байг) үеэс Бани Шайба овгийнхонд хадгалагдаж ирсэн.

Каабын дотор орвол анхилуун үнэр үнэртэнэ. Учир нь цэвэрлэгээний дараа их хэмжээний сүрчиг цацаж, арчдаг. Шал нь цагаан гантиг хавтангаар бүрсэн. Дээд хэсэгт нь өнгө, хийцээрээ онцгой нэг газар бий. Энэ нь мусульманчууд Меккаг эзэлсний дараа Пайгамбар маань (түүнд Аллахын энэрэл, амар амгалан байг) намаз үйлдсэн газар юм.

Ханын доод хэсэг нь цагаан гантиг, хаалганы дээд тал болон тааз нь мөнгөн утсаар Куран айатууд бичсэн ногоон торгон даавуугаар бүрсэн. Хананд арван самбар өлгөөтэй, эдгээр дээр Каабыг барих, засварлахад оролцсон захирагчдын нэрс бичигдсэн байдаг.

Каабын таазыг гурван бор өнгийн багана тулж байдаг. Эдгээр багана нь хамгийн бат бөх модоор хийгдсэн тул 1350 орчим жил эвдрэлгүй хадгалагдсан. Үүнийг Пайгамбарын маань (түүнд Аллахын энэрэл, амар амгалан байг) сахаба Абдулла ибн Зубайр барьсан гэдэг. Багануудын хооронд алтадсан олс татсан бөгөөд дээр нь мөнгө, гууль зэрэг материалаар хийсэн олон хуучин дэнлүү, залбирлын савнууд байрладаг. Каабын баруун талд "тауба" гэж нэрлэдэг хаалга бий. Энэ хаалгаар Каабын дээвэр рүү гарах шат байдаг. Сүмийн ажилтнууд Каабын бүрээсийг солихдоо энэ шатаар өгсдөг.

Каабын үүдний хоёр баганын хооронд дунд зэргийн хэмжээтэй модон ширээ бий. Ширээний шургуулганд Каабад цацдаг сүрчиг болон бусад хэрэгслүүд хадгалагддаг.

Медет КУРМАШУЛЫ

"Иман" сэтгүүл, №6, 2023 он