Курбан тахиллагын утга учир юу вэ?

Курбан тахиллага өргөх нь хүн төрөлхтөнд ахирт шагнал, их буян хүртээдэг.

Элч Мухаммад (түүнд Аллахын энэрэл, амар амгалан байг):

ما عمل ابن آدم يوم النحر أحب إلى الله من إهراق الدم، وإنه ليؤتى يوم القيامة بقرونها وأشعارها وأظلافها، وإن الدم ليقع من الله بمكان قبل أن يقع بالأرض، فطيبوا بها نفسا

"Хүн төрөлхтөн Курбан айтын өдөр (тахил өргөж) цус урсгахаас илүү Аллахад таалагдах өөр үйл хийж байгаагүй. Тахилын амьтан амилалтын өдөр эвэр, туурай, ноос бүхнээрээ ирнэ. Урссан цус нь газар унахаас өмнө Аллахын өмнө өндөр байр сууринд хүрдэг. Тиймээс тахилаа сэтгэл хангалуун өргөөрэй" [1] – гэжээ.

Өөр нэг хадист:

بكل شعرة حسنة

Тахилын амьтны биеийн бүх үс бүрт буян бичигдэнэ гэж дурдсан байна [2].

Курбан тахиллага өргөх нь Аллахын өгсөн нигүүлслийг талархан хүлээн зөвшөөрч буйг илэрхийлдэг. Аллахын өгсөн нигүүлсэл маш их бөгөөд тоолж баршгүй. Аллах Куранд:

وَإِنْ تَعُدُّوا نِعْمَةَ اللَّهِ لا تُحْصُوهَا

"Хэрвээ та нар Аллахын нигүүлслийг тоолбол, тоонд нь хүрч чадахгүй" [3] – гэжээ. Итгэл, мөргөл, сонсох, харах, эд хөрөнгө, үр хүүхэд – энэ бүхэн бол Аллахын өгсөн нигүүлсэл. Энэ нигүүлсэл үргэлжлэхийн тулд талархал илэрхийлэх хэрэгтэй. Аллахын нигүүлсэлд талархах нэг арга бол Аллахын замд эд хөрөнгө зарцуулах. Курбан тахиллага өргөх нь Аллахад талархахын нэг илэрхийлэл юм.

Курбан тахиллагаар дамжуулан бид Аллахын тушаалд захирагдах, тэвчээртэй байхыг сурдаг. Ибрахим болон Исмаил элч нарын Аллахын тушаалд захирагдаж, бат зогссон түүхийг эргэн санавал, тэдний Аллахад хандах захирагдал, хайр нь бүхнээс дээгүүр байсныг харж болно. Энэ нь биднийг ч мөн Аллахын тушаалд захирагдахад урамшуулж, тэвчээртэй байхыг зоригжуулдаг.

Курбан тахилын махыг гэр бүл, ойр дотнынхон, хөршүүд, найз нөхөд, хэрэгцээтэй хүмүүст хуваарилах нь мусульманчуудын дунд хайр, эв нэгдлийг нэмэгдүүлдэг. Нэг малаа өргөж, ядуу, хэрэгцээтэй ах дүүстээ туслах замаар муу зан чанараа ахан дүүсийн сэтгэл, өгөөмөр сэтгэл, даруу зан зэрэг сайн чанараар сольдог. Манай шариат ийм үйлдлийг хийхийг шаарддаг бөгөөд сайн үйлд тооцогддог.

• [1] Тирмизи дамжуулсан.

• [2] Ибн Мажа, №3118.

• [3] "Ибрахим" сүрэг, 34-р аят.