Мансууруулах бодис хэрэглэхийн шариатын шийд юу вэ?

Имам әл-Ғазали "әл-Мустасфа" бүтээлдээ: "Шариат нь таван зүйлийг — шашин, амь, оюун ухаан, үр удам, эд хөрөнгийг хамгаалахад чиглэдэг. Эдгээрийг хамгаалах бүхий л үйлс нь сайн, харин эдгээрт хор хохирол учруулах бүхий л үйл нь муу бөгөөд түүнийг зогсоох, урьдчилан сэргийлэх нь сайн үйл" гэжээ. Мансууруулах бодис хэрэглэх нь эдгээр таван зүйлд бүгдэд нь хор хохиролтой.

Мансууруулах бодис хэрэглэгч нь Аллах Тааллагийн тушаалд захирагддаггүй, биелүүлэх ёстой үүргүүдээ биелүүлдэггүй, нүгэл үйлдэхээс айдаггүй. Үүний үр дүнд шашнаа хамгаалахгүй, хойдын ертөнцийн нигүүлслээс хоцрох аюултай. Мөн мансууруулах бодис нь хүний оюун ухааныг хордуулж, эрүүл мэндэд нь хохирол учруулахаас гадна донтуулах, эцэстээ үхэлд хүргэх аюултай. Хар тамхи хэрэглэгчийн бэлгийн чадавхи буурч, түүнээс төрсөн хүүхдүүд ихэвчлэн гажигтай, оюуны хомсдолтой байдаг. Тиймээс хар тамхины дон нь хүний шашин, эрүүл мэнд, үр удамд хор хохиролтойгоор зогсохгүй, гэмт хэрэгт түлхэх замаар нийгэмд ч сөрөг нөлөө үзүүлдэг.

Мансууруулах бодис хэрэглэхийн шариатын шийд — харам. Манай эрдэмтэд үүнд хэд хэдэн нотолгоо гаргасан. Аллах Таала "Мәида" сүрэг, 90-р аятад:

"Итгэл үнэмшилтэй хүмүүс ээ! Үнэхээр архи, мөрийтэй тоглоом, шүтээнүүд, (мэргэний сумнууд) — эдгээр нь шайтаны бузар үйлс юм. Үүнээс хол бай, магадгүй та амжилтад хүрнэ!"

Архи хүнийг согтоож, ухаанаас нь салгадаг. Мансууруулах бодис ч мөн адил тул хэрэглэх нь харам.

Аллах Таала "Ағраф" сүрэг, 157-р аятад:

"Тэрээр тэдэнд сайн зүйлийг халал болгож, бузар зүйлийг харам болгодог..."

Ухаантай хүн мансууруулах бодисыг бузар зүйлд тооцох нь тодорхой. Мөн Аллах Таала "Бақара" сүрэг, 195-р аятад:

"Өөрсдийгөө өөрсдийн гараар сүйрэлд бүү хүргэ"

Шариат нь хүний амь, эрүүл мэндэд хор хохирол учруулах аливаа зүйлээс хол байхыг уриалдаг. Харин мансууруулах бодис нь бие махбод, сэтгэл зүй, нийгэмд олон сөрөг үр дагавар авчирдаг.

Имам ибн Әбидин өөрийн номондоо: "Гашиш, опиум хэрэглэх нь харам. Учир нь энэ нь ухаан самуурталд хүргэж, Аллахыг дурсахаас, намаз үйлдэхээс холдуулдаг" гэжээ.

Дүгнэж хэлэхэд, хар тамхины дон нь хувь хүнд ч, нийгэмд ч асар их хор хохиролтой. Тиймээс шариат мансууруулах бодис хэрэглэхийг харам болгосон. Мөн мансууруулах бодисыг худалдах, худалдан авах, түүнээс ашиг олохыг ч харам болгосон. Учир нь харамд хүргэх бүхэн өөрөө ч харам юм.

Медет Курмашұлы,

"Иман" сэтгүүл, №1, 2023 он