Намаз уншаагүй хүн нүгэлтэн үү?

Намаз бол Ислам шашны таван тулгуурын хоёр дахь нь юм. Ибн Омарын уламжлуулсан нэгэн хадист Пайгамбар (түүнд Аллахын энэрэл, амар амгалан байг) ингэж айлдсан байдаг: “Ислам таван зүйл дээр тогтсон: Аллахаас өөр бурхан үгүй, Мухаммад бол Түүний элч гэдгийг гэрчлэх, намаз үйлдэх, закат өгөх, боломжтой бол хаж хийх, Рамадан сард мацаг барих.”

Өөрөөр хэлбэл, бид итгэл үнэмшлээ илэрхийлсний дараа Пайгамбарт (түүнд Аллахын энэрэл, амар амгалан байг) оногдсон хамгийн анхны үүрэг бол намаз юм. Мөн намаз бол сүүлчийн өдөр хамгийн түрүүнд асуугдах үйлдэл. Хадист: “Амьдралын эцэст боолын үйлдлээс хамгийн түрүүнд тооцогдох нь намаз. Хэрвээ намаз нь зөв бол тэр баяр баясгаланд хүрч, сайн сайхныг хүртэнэ. Харин намаз нь буруу бол зовлон шаналалд унаж, ихэд харамсана...” гэжээ. Өөр нэг хадист: “Намаз бол шашны тулгуур. Хэн үүнийг үйлдвэл шашныг босгосон, хэн үүнийг орхивол шашныг нураасан” гэжээ.

Өдөрт таван удаа намаз үйлдэх нь насанд хүрсэн, ухаан санаа эрүүл мусульман хүн бүрт – фарз айн буюу заавал биелүүлэх үүрэг юм. Өөрөөр хэлбэл, мусульман хүн энэ үүргээ өөрөө биелүүлээгүй цагт түүний хариуцлагаас чөлөөлөгдөхгүй. Хэрвээ хэн нэгэн энэ фарз намазаа энэ дэлхийд үйлдвэл, тэр үүргээсээ чөлөөлөгдөж, сүүлчийн өдөр үйлдсэн намазныхаа шагналыг хүртэнэ, мөн түүний намаз нь диваажинд ороход нь шалтгаан болно. Хадист: “Диваажингийн түлхүүр – намаз. Намазын түлхүүр – тахарат авах” гэжээ. Харин хэн нэгэн залхуурлаасаа болж намазанд хайхрамжгүй хандаж, энэ дэлхийд намаз уншаагүй бол тэр хүн нүгэл үйлдсэнд тооцогдоно.

Дүгнэж хэлбэл, насанд хүрсэн, ухаан санаа эрүүл мусульман эрэгтэй, эмэгтэй хүн бүрт өдөрт таван удаа намаз үйлдэх нь фарз. Сүүлчийн өдөр хамгийн түрүүнд асуугдах үйлдэл бол намаз. Намаз үйлдсэнээр мусульман хүн Аллахын тааллыг хүртэнэ, харин намаз уншаагүй бол Аллахын тушаалд эсэргүүцэж, нүгэл хураана. Аллах Таала бид бүхнийг намазандаа тууштай, төгс төгөлдөр, тасралтгүй үйлдэгчдийн эгнээнд багтаагаасай!

Медет КУРМАШУЛЫ

“Иман” сэтгүүл, №10, 2024 он